حافظ آباد، پی ٹی آئی اور مسلم لیگ (ن )کے کارکنوں میں جھگڑا،10 افراد زخمی ہو گئے

حافظ آباد(اُردو پوائنٹ اخبارتازہ ترین - این این آئی۔ 18 جولائی2018ء) حافظ آبادمیں پی ٹی آئی اور مسلم لیگ ن کے کارکنوں میں جھگڑے کے دوران دونوں پارٹیوں کے 10 افراد زخمی ہو گئے۔پی ٹی آئی کارکنوں نے لیگی امیدوار کے مرکزی دفتر اور ہسپتال میں داخل ہو کر توڑ پھوڑ بھی کی۔ جس پر پولیس تھانہ سٹی نے پی۔ٹی۔آئی کے ضلعی قائد اور سابق ایم۔این۔اے مہدی حسن بھٹی سمیت240سے زائد ملزمان کے خلاف مقدمہ درج کرلیا۔

تفصیلات کے مطابق حافظ آباد کے علاقہ چوک فاروق اعظم میںمسلم لیگ ن کی انتخابی کارنر میٹنگ جاری تھی جس سے ن لیگ کے صوبائی امیدوار ڈاکٹر مظفر علی شیخ خطاب کررہے تھے کہ اسی دوراں وہاں سے پی۔ٹی۔آئی کی گاڑیوں اور موٹرسائیکلوں کا کارواں گذرا تو دونوں پارٹیوں کے کارکنوں نے ایک دوسرے کے خلاف نعرہ بازی کی جس پر ان کے مابین جھگڑا ہوگیا۔

(جاری ہے)

اس جھگڑے کے نتیجہ میں دونوں پارٹیوں کے 10کارکنان زخمی ہوگئے ۔ پی ٹی آئی کے مشتعل کارکنوں نے ڈنڈے سوٹوں سے پی پی 70سے لیگی امیدوار ڈاکٹر مظفر علی شیخ کے مرکزی دفتر اور اور انکے ہسپتال میں داخل ہو کر توڑپھوڑ کی،پی ٹی آئی کارکنوں نے دفتر میں ایل سی ڈی،لیپ ٹاپ اور دیگر قیمتی اشیاء توڑ دیں جبکہ ہسپتال کے شیشے ،سی سی ٹی وی کیمرے اور فرنیچر بھی توڑ دیا۔

لڑائی جھگڑے کے باعث ہسپتال میں داخل مریض ڈر کے بھاگ نکلے۔پی ٹی آئی کے کارکنوں نے لیگی امیدوار کے حمایتی دوکانداروں کو بھی تشدد کا نشانہ بنایا اور انکی دوکان پر توڑ پھوڑ کی۔زخمی کارکنوں کو ٹراما سنٹرمنتقل کر دیا گیا۔دوسری جانب بازار آرئیاں والا، ڈاکخانہ روڈ اور مین بازار کے تاجروں اور دوکانداروںنے واقعہ کے خلا ف جزوی ہڑتال کیے رکھی۔

دوسری جانب پولیس تھانہ سٹی نے لیگی امیدور صوبائی اسمبلی ڈاکٹر مظفر علی شیخ کی مدعیت میں انتخابی دفتر اور ہسپتال میں توڑ پھوڑ اور کارکنوںکو زخمی کرنے کے الزام میں سابق ایم۔این۔اے مہدی حسن بھٹی ۔ سابق ناظم مہر محمد رضوان، ز ملک پھول خان اعوان، ملک رب نواز، نوید لنگاہ، ارباب اکرم، کاشف عرف کاشی، ملک آصف مٹھو، حاجی عنصر ، ملک غلام حسین شارو، ملک علی ذوالقرنین، قاضی ارشاد، الطاف بھٹی رنگ والا، سمیت 240سے زائد ملزمان کے خلاف مقدمہ درج کرلیا ہے۔

دوسری جانب پی۔ٹی۔آئی کے ضلعی صدر چوہدری شعیب حیات تارڑ نے کہا ہے کہ لیگی کارکنوں نے ہم پر حملہ کرنے میں پہل کی۔ جس سے ہمارے پانچ کارکنان بھی ذخمی ہوئے ہیں ۔ ہم نے ان کا میڈیکل لے لیا ہے اور حملہ آور عناصر کے خلاف مقدمہ کے اندراج کے لئے تھانہ میں درخواست دے رہے ہیں۔