_پروازوں کی منسوخی پر ترجمان پی آئی اے کی وضاحت

جمعرات 26 اکتوبر 2023 19:00

/کراچی (اُردو پوائنٹ اخبارتازہ ترین - آن لائن۔ 26 اکتوبر2023ء) ترجمان پی آئی اے کا کہنا ہے کہ قومی ایئر لائنز کا گزشتہ 2 ہفتوں سے معمول کا آپریشن معطل ہے جبکہ یومیہ بنیاد پر پروازیں شیڈول کی جا رہی ہیں، ایندھن کی مقدار میں دستیابی کو مد نظر رکھ کر پروازیں چلائی جا رہی ہے، صرف وہ پروازیں آپریٹ کی جا رہی ہیں جن کیلئے ایندھن کی فراہمی یقینی ہوتی ہے۔

وضاحتی بیان میں پی آئی اے ترجمان کا کہنا ہے کہ پی آئی اے کی بڑی تعداد میں پروازیں منسوخ ہو رہی ہیں یہ کہنا درست نہیں، قومی ایئرلائنز کی جانب سے پی ایس او کو ایندھن فراہمی کیلئے پیشگی ادائیگی کی جاتی ہے، انتظامیہ اپنے ذرائع سے کچھ فنڈز کے حصول کیلئے کوشاں ہے، فنڈز دستیاب ہوتے ہی پی آئی اے معمول کی پروازیں چلانا شروع کر دے گی۔

(جاری ہے)

قومی ایئرلائنز کے ترجمان نے کہا کہ پی آئی اے نے اپنا بین الاقوامی آپریشن بحال رکھنے کیلئے منصوبہ بندی کر رکھی ہے، بین الاقوامی آپریشن میں کینیڈا، ترکی، چین، ملائیشیا اور سعودی عرب کے آپریشن کو ترجیح دی جا رہی ہے تاہم اندرون ملک آپریشن متاثر ضرور ہے مگر اس کی بتدریج بحالی کی منصوبہ بندی پر کام جاری ہے۔

انہوں نے کہا کہ مسافروں کو ان کی مطلوبہ پروازوں کے متعلق پی آئی اے کال سینٹر کے ذریعے آگاہی فراہم کی جا رہی ہے، آپریشن متاثر ہونے سے مسافروں کو درپیش مشکلات اور زحمت کیلئے معذرت خواہ ہیں۔#