ریاست کے اچھے کام کی تعریف کی جانی چاہیے ،طلبا کے لئے لیب ٹاپ سکیم، فری انٹرنیٹ سکیم اور ای بائیک سکیم اچھے اقدامات ہیں ،وائس چانسلر پنجاب یونیورسٹی

لاہور (اُردو پوائنٹ اخبارتازہ ترین - اے پی پی۔ 18 اپریل2024ء) وائس چانسلر پنجاب یونیورسٹی پروفیسر ڈاکٹر خالد محمود نے کہا ہے کہ پاکستان میں سب سے زیادہ تعداد نوجوانوں کی ہے جن کو مہارت سے لبریز کرکے روزگار کے لئے تیار کرنابڑا چیلنج بنتا جا رہا ہے۔ وہ پنجاب یونیورسٹی ادارہ تعلیم و تحقیق میں شعبہ ٹرانسپورٹ اینڈ ماس ٹرانزٹ حکومت پنجاب اور بینک آف پنجاب کے اشتراک سے چیف منسٹریوتھ انیشیئٹیو کے تحت طلباطالبات کو موٹر بائیکس کی فراہمی کے حوالے سے منعقدہ آگاہی سیمینار سے وحید شہید حال میں خطاب کررہے تھے۔

اس موقع پر سیکرٹری ٹرانسپورٹ ڈاکٹر احمد جاوید قاضی، رجسٹرار ڈاکٹر احمد اسلام، ڈائریکٹر شعبہ امور طلبا ڈاکٹر محمد علی کلاسرا،ڈائریکٹر جنرل انفارمیشن ٹیکنالوجی ڈاکٹر کامران عابد، فیکلٹی ممبران،پی ایچ ای سی، پی آئی ٹی بی اور پنجاب بینک سے آفیشلز سمیت طلباطالبات نے بڑی تعداد میں شرکت کی۔

(جاری ہے)

پروفیسر ڈاکٹرخالد محمود نے کہا کہ ریاست کے اچھے کام کی تعریف کی جانی چاہیے۔

انہوں نے کہا کہ حکومت کی طرف سے طلبا کے لئے لیب ٹاپ سکیم، فری انٹرنیٹ سکیم اور اب ای بائیک سکیم یقینا اچھے اقدامات ہیں۔ انہوں نے کہاکہ پنجاب یونیورسٹی کے پاس طلبا کو سفری سہولیات فراہم کرنے کے لئے 60بسیں ہیں جو طلبا کی تعداد میں اضافے کے باعث ناکافی ہوتی جارہی ہیں جس کی کمی کو پورا کرنے کے لئے یہ سکیم کار آمد رہے گی۔انہوں نے کہا کہ اس سکیم سے خاص طور پر طالبات کو ضرورفائدہ اٹھانا چاہیے۔

سیکرٹری ٹرانسپورٹ ڈاکٹر احمد جاوید قاضی نے کہا کہ نوجوان طلبا پاکستان کا مستقبل ہیں اورحصول تعلیم میں آسانیاں حاصل کرنا ان کا حق ہے۔ انہوں نے کہا کہ حکومتی اقدامات کا مقصد طلبا کی اداروں تک رسائی اور کوالٹی ایجوکیشن کی فراہمی کو یقینی بنانا ہے۔انہوں نے کہا کہ وزیر اعلیٰ کے ویژن کے مطابق طلبا کے لئے سکیم کو سود سے پاک اور آسان رکھا گیا ہے۔ انہوں نے کہا کہ طلبا کو اپنے مضامین میں مہارت حاصل کرکے ملک و قوم کی ترقی کیلئے کردار ادار کرناچاہئے۔ قبل ازیں ڈاکٹر وسیم نے سکیم کے حوالے سے شرکا کو بریفنگ دی۔