برآمد سے متعلق رواں ہفتے مثبت حتمی حکومتی فیصلہ متوقع ہے‘ شوگر ملز ایسوسی ایشن

ثابت ہو چکا ملک میں اس وقت 15لاکھ ٹن اضافی چینی موجود ہے ‘ ترجمان کا بیان

پیر 29 اپریل 2024 22:44

لاہور(اُردو پوائنٹ اخبارتازہ ترین - این این آئی۔ 29 اپریل2024ء) پاکستان شوگر ملز ایسوایشن (پنجاب زون) نے کہا ہے کہ حکومت نے شوگر ملوں کو ملکی ضرورت سے اضافی چینی کی برآمد کی اجازت دینے سے قطعی انکار نہیں کیا۔ترجمان نے کہا کہ وزارتِ صنعت و پیداوار کے ذمہ دران سے رابطہ کرنے پر معلوم ہوا ہے کہ انہوں نے ایسی کوئی خبر جاری نہیں کی۔ وزارت میں جمع کروائے گئے اعداد و شمار سے یہ ثابت ہو چکا ہے کہ ملک میں اس وقت 15 لاکھ ٹن اضافی چینی موجود ہے اور حکومت کو جلد اسے برآمد کرنے کے حوالے سے کوئی فیصلہ کرنا چاہیے۔

(جاری ہے)

وزارت میں آخری ہونے والے اجلاس میں شوگر برآمد کی بابت اچھی پیشرفت ہوئی ہے اور اس ہفتہ میں شوگر ایکسپورٹس پر مثبت حتمی حکومتی فیصلہ متوقع ہے۔ چینی کی برآمدات کیلئے منفی تاثر قائم کرنے کے پیچھے سٹہ مافیا کا ہاتھ ہے جنہوںنے مہینے کے آخر میں اپنے سٹے کی رقم کو کلیئر کرنا ہوتا ہے۔ اس قسم کی چربہ سازی والی افواہیں مارکیٹ میں پھیلا کر یہ ملک دشمنی کا ثبوت دے رہے ہیں۔ وزارتِ پیداوار کے ذرائع کا نام استعمال کر کے ایسی خبروں کو پھیلانا ملک کی ایک بڑی ملکی انڈسٹری کے ساتھ ایک گھناونی سازش ہے۔