مودی اپنے گھر کی خیر منائیں مقبوضہ کشمیر میں جاری ظلم و ستم سے تحریک آزادی میں مزید تیزی آئے گی، فیصل ممتاز راٹھور

مظفرآباد (اُردو پوائنٹ اخبارتازہ ترین - این این آئی۔ 18 مئی2024ء) آزاد کشمیر کے وزیر بلدیات و سیکرٹری جنرل پاکستان پیپلز پارٹی فیصل ممتاز راٹھور نے کہا ہے کہ بھارتی وزیراعظم نریندر مودی اپنے گھر کی خیر منائیں مقبوضہ کشمیر کے اندر جو ظلم و ستم جاری ہے اس سے تحریک آزادی میں مزید تیزی آئے گی۔آزاد کشمیر کی طرف میلی آنکھ سے دیکھا تو اس کے نتائج بھی سنگین ہونگی کشمیری پاک فوج کے ساتھ ہر اول دستے کا کردار ادا کر رہے ہیں۔

بارڈر پر ہمارے کشمیری بھائی پاک فوج کے آگے مورچوں پر اپنی ڈیوٹی سر انجام دیتے ہیں اپنے بچوں بچیوں مائوں بہنوں کی قربانیاں دینے سے بھی گریزاں نہیں ہیں نہتے کشمیریوں نے چھتیر سالوں میں۔ جرات اور بہادری کے ساتھ آزادی کے حصول کے لیے جدوجہد کی ہے اور آگے بھی کرتے رہینگے حکومت آزاد کشمیر کشمیریوں کی پشت پر کھڑی ہے عالمی برادری کے دوہرے معیار کو ترک کرنا ہوگا کشمیریوں کو حق خودارادیت دئیے بغیر امن ممکن نہیں۔

(جاری ہے)

پاکستان پیپلز پارٹی جمہوریت پہ یقین رکھتی ہے۔صدر پاکستان آصف علی زرداری سوا کروڑ کشمیریوں کے نمائندے ہیں۔ذوالفقار علی بھٹو سے بے نظیر بھٹو اور بینظیر بھٹو سے لے کر آصف علی زرداری اور بلاول بھٹو زرداری نے مسئلہ کشمیر پر کبھی سمجھوتہ نہیں کیا اور کشمیریوں کی اخلاقی سیاسی اور سفارتی حمایت جاری رکھی ہے۔مقبوضہ کشمیر میں مظلوم خاندان کے ساتھ آج بھی صدر پاکستان کا دل دھڑکتا ہے۔فیصل راٹھور نے کہا کہ عالمی برادری کشمیریوں پر ظلم و جبر بند کروائے۔