کامن ویلتھ گیمز ، ہاکی کے مقابلے میں پاکستان اور انگلینڈ کے مابین گروپ میچ دو، دو گول سے برابر

تین میچ ڈرا کرنے کے بعد پاکستان کے سیمی فائنل میں رسائی کے امکانات کم ہو گئے ،پاکستان آخری میچ 11اپریل کوملائیشیاء کے خلاف کھیلے گا

اتوار اپریل 14:40

کامن ویلتھ گیمز ، ہاکی کے مقابلے میں پاکستان اور انگلینڈ کے مابین گروپ ..
گولڈ کوسٹ (اُردو پوائنٹ اخبارتازہ ترین۔ 08 اپریل2018ء) آسٹریلیا کے شہر گولڈ کوسٹ میں جاری کامن ویلتھ گیمز میں ہاکی کے مقابلے میں پاکستان اور انگلینڈ کے مابین گروپ میچ دو، دو گول سے برابر ہو گیا۔۔پاکستان کی جانب سے ارسلان قادر اور علی مبشر نے ایک ایک گول سکور کیا جبکہ انگلینڈ کی جانب سے مارک گلیگ ہورن اور سیم وارڈ نے گول سکور کیے۔ٹورنامنٹ میں یہ پاکستان کا تیسرا میچ تھا اور تینوں میچ ڈرا کرنے کے بعد پاکستان کے سیمی فائنل میں رسائی کے امکانات کافی کم ہو گئے ہیں۔

اس میچ میں دونوں ٹیموں نے قدرے محتاط انداز میں شروعات کیں اور پہلے دو کوارٹرز میں مقابلہ بغیر کسی گول کے برابر تھا اور دونوں ٹیموں نے زیادہ جارحانہ انداز نہیں اپنایا۔تیسرا کوارٹر شروع ہوتے ہیں کھیل میں واضح تیزی دیکھنے میں آئی اور پاکستان کی جانب سے ارسلان قادر نے فیلڈ گول سکور کر کے پاکستان کو سبقت دلا دی۔

(جاری ہے)

لیکن تین منٹ بعد انگلینڈ کی جانب سے گلیگ ہورن نے پینالٹی کارنر پر گول کر کے میچ برابر کر دیا۔

اس کے بعد دونوں ٹیموں نے ایک دوسرے پر تابڑ توڑ حملے شروع کر دئیے اور مقابلہ ایک سمت سے دوسری سمت تک شروع ہو گیا۔آخری کوارٹر کے آغاز پر پاکستان نے گول سکور کرنے کا سنہرا موقع ضائع کر دیا اور پاکستان کو اس کا خمیازہ فوراً بھگتنا پڑا جب اگلے ہی منٹ میں انگلینڈ کی جانب سے سیم وارڈ نے پینالٹی کارنر پر اپنی ٹیم کے لیے دوسرا گول کر دیا۔

اس موقع پر پاکستان نے ایک بار پھر اپنی ثابت قدمی دکھاتے ہوئے انگلینڈ کے گول پر حملے جاری رکھے اور میچ ختم ہونے سے تین منٹ قبل امپائر ریویو کا مطالبہ کیا جس کی مدد سے انہیںپینالٹی کارنر ملا اور علی مبشر نے گول کر کے میچ برابر کر دیا۔آخری لمحات میں انگلینڈ کی ٹیم نے گول کر دیا لیکن امپائر نے ان کی اپیل مسترد کر دی۔۔پاکستان ٹورنامنٹ میں اپنا آخری میچ 11 اپریل کو ملائیشیا کے خلاف کھیلے گا۔ واضح رہے کہ اس سے قبل پاکستان نے ویلز کے خلاف 1-1 جبکہ انڈیا کے خلاف 2-2 سے میچ ڈرا کیے تھے۔

مزید متعلقہ خبریں پڑھئیے‎ :

وقت اشاعت : 08/04/2018 - 14:40:05

متعلقہ عنوان :

Your Thoughts and Comments