بھارت کے خلاف میچ کے لئے تیار ہیں، کپتان قومی انڈر 19 ٹیم

اسلام آباد (اُردو پوائنٹ اخبارتازہ ترین - این این آئی۔ 03 ستمبر2019ء) قومی انڈر 19 ٹیم کے کپتان روحیل نذیر نے کہا ہے کہ ایشیا کپ میں بھارت کے خلاف میچ کوعام میچز کی طرح لے کر کھیلیں گے۔میڈیا سے گفتگو کے دوران ان کا کہنا تھا کہ ایشیا کپ کے تمام ہی میچز اہم ہیں اور کسی بھی ٹیم کو ہلکا نہیں لیا جا سکتا، چاہے بھارت ہو، کویت ہو یا افغانستان ہم نے ہر میچ کے لئے حکمت عملی ترتیب دی ہوئی ہے۔

انہوں نے کہا کہ ہماری کوشش ہے کہ اس میگا ٹورنامنٹ میں جارحانہ کھیل پیش کرتے ہوئے اچھی کارکردگی دکھائیں۔

(جاری ہے)

ٹورنامنٹ میں شرکت سے قبل تربیتی کیمپ کے حوالے سے بات کرتے ہوئے انہوں نے کہا کہ ہم نے اس ٹورنامنٹ کے لئے خوب تیاری کی ہے، ہم نے کوشش کی ہے تربیتی کیمپ کے دورن اپنی خامیوں کو دور کیا جا سکے۔انہوںنے کہاکہ اگر ہم انڈر 19 لیول پر اچھی کارکردگی دکھائیں گے تو یقیناً ہمیں پاکستان سپر لیگ (پی ایس ایل) میں کھیلنے کا موقع دیا جائے گا۔انہوں نے کہا کہ میں پوری کوشش کروں گا کہ اپنی بلے بازی کی صلاحیتوں سے ٹیم کو زیادہ سے زیادہ فائدہ پہنچا سکوں۔واضح رہے پاکستان اور بھارت کے درمیان ایشیا کپ کا میچ 7 ستمبر کو سری لنکا میں کھیلا جائے گا۔