بلوچستان نے سندھ کو 52رنز کے بھاری مارجن سے شکست دے دی

لاہور (اُردو پوائنٹ اخبارتازہ ترین۔ 15 اکتوبر2019ء) ایونٹ کے دوسرے روز اقبال اسٹیڈیم فیصل آباد میں کھیلے گئے دوسرے میچ میں بلوچستان نے سندھ کو 52 رنز سے شکست دے دی۔ فاتح ٹیم کے اوپنر اویس ضیاء نے 77 جبکہ بسم اللہ خان نے 54رنز کی جارحانہ اننگز کھیلی۔234 رنز کے تعاقب میں سندھ کی پوری ٹیم 181 رنز بنا کر آوٴٹ ہوگئی۔

اس سے قبل سندھ نے ٹاس جیت کر پہلے فیلڈنگ کا فیصلہ کیا۔

بلوچستان کے بلے بازوں نے اننگز کے آغاز سے ہی جارحانہ بیٹنگ کا مظاہرہ کیا۔ اویس ضیاء اور امام الحق کی اوپننگ جوڑی کے درمیان 60 رنز کی شراکت قائم ہوئی۔ امام الحق15 گیندوں پر 25 رنز بنا کر آوٴٹ ہوئے ، جس کے بعد اویس ضیاء نے دوسری وکٹ کے لیے بسم اللہ خان کے ہمراہ 99 رنز کی شراکت قائم کی۔

(جاری ہے)

48 گیندوں کا سامنا کرنے والیاویس ضیاء نے 7 چھکوں اور 5 چوکوں کی مدد سے 77 جبکہ بسم اللہ خان نے 30 گیندوں پر 4 چھکوں اور 4 چوکوں کی مدد سے 54 رنز اسکور کیے۔

آلراوٴنڈر عماد بٹ کی جانب سے اختتامی لمحات میں 10 گیندوں پر 31 رنز کی جارحانہ اننگز کی بدولت بلوچستان کی ٹیم نے مقررہ 20 اوورز میں 6 وکٹوں کے نقصان پر 233 رنز بنائے۔سندھ کی جانب سے محمد حسنین نے 3 کھلاڑیوں کو آوٴٹ کیا۔