کرکٹ آسٹریلیا بھارتی ٹیم کو قرنطینہ سے استثنی دلوانے کے لیے بھی تیار

سڈنی (اردو پوائنٹ تازہ ترین اخبار۔8اگست 2020ء ) ٹی ٹونٹی ورلڈ کپ کی میزبانی مزید دو سال دور ہونے کے بعد اب کرکٹ آسٹریلیا نے تمام نظریں بھارتی ٹیم کے دورہ پر لگالی ہیں۔ کرکٹ آسٹریلیا کے عبوری چیف ایگزیکٹو نک ہاکلے کا کہنا ہے کہ رواں سال اکتوبر،نومبر میں ٹی ٹونٹی ورلڈٰ کپ کی میزبانی کے لیے انتظامات مکمل تھے لیکن اب ہمیں مزید دو برس انتظار کرنا ہوگا، اب ہماری کوشش ہے کہ بھارتی ٹیم کے دورے کے لیے قرنطینہ کا استثنی مل سکے، موجودہ حالات کے تحت پابندی لگائی گئی ہیں، یقین ہے کہ دسمبر تک حالات کافی بدل چکے ہوں گے۔

انہوں نے کہا کہ ریاست وکٹوریا میں کورونا وائرس کے پھیلاو کے باوجود پر امید ہیں کہ میلبورن کرکٹ گرائونڈ میں باکسنگ ڈے ٹیسٹ پروگرام کے مطابق ہوسکے گا، ابھی اس کے بارے میں کوئی بھی بات کرنا قبل ازوقت ہے۔

(جاری ہے)

بھارت اور آسٹریلیا کے درمیان چار ٹیسٹ میچز کی سیریز کا پہلا ٹیسٹ تین دسمبر سے برسبین میں شیڈول ہے، دوسرا ٹیسٹ گیارہ دسمبر سے ایڈیلیڈ میں ہوگا،چھبیس دسمبر سے میلبورن جب کہ تین جنوری سے سڈنی میں ٹیسٹ میچ فائنل کیا گیا ہے، میڈیار پورٹس کے مطابق کورونا وائرس کے سبب آخری دونوں ٹیسٹ سڈنی کرکٹ گرائونڈ میں ہوسکتے ہیں۔