سہیل تنویر کی یونس خان کو بیٹے کی پیدائش کے 4 سال بعد مبارکباد، سوشل میڈیا صارفین کی ٹرولنگ

لاہور (اردو پوائنٹ تازہ ترین اخبار ۔ 26 دسمبر 2022ء ) قومی ٹیسٹ کرکٹر سہیل تنویر نے پاکستان کے سابق کپتان یونس خان کو بیٹے کی پیدائش کے چار سال بعد مبارکباد پیش کی جس کے بعد سوشل میڈیا صارفین نے ٹرولنگ شروع کردی۔ گزشتہ دنوں یونس خان کی 2018ء میں کی گئی ٹوئٹس کچھ سوشل میڈیا اکاؤنٹس نے شیئر کیں اور یہ دعویٰ کیا کہ کرکٹر کے ہاں بیٹے کی پیدائش ہوئی ہے جب کہ یہ تصاویر چار سال پرانی تھیں۔

(جاری ہے)

یونس خان نے بتایا تھا کہ ان کے ہاں دوسرے بیٹے کی پیدائش ہوئی ہے لیکن اب سہیل تنویر نے ٹوئٹ شیئر کرتے ہوئے انہیں مبارکباد پیش کی جو وائرل ہوگئی۔ سوشل میڈیا صارفین نے سہیل تنویر کی ٹوئٹ پر دلچسپ تبصرے کیے، کسی نے ان کے وائی فائی کو سلو کہا تو کوئی یہ کہتا رہا کہ انہوں نے سرکاری وائی فائی پی ٹی سی ایل لگوایا ہوگا تبھی مبارک باد کی ٹوئٹ اب پوسٹ ہوئی۔ پی ٹی سی ایل نے بھی دلچسپ تبصرہ کیا۔