شمالی وزیرستان، نوجوان کرکٹر کو گولی مار کر قتل کر دیا گیا

پشاور (اردو پوائنٹ تازہ ترین اخبار ۔ 22 فروری 2023ء ) شمالی وزیرستان کے علاقے میر علی میں ایک نوجوان کرکٹر کو گولی مار کر قتل کر دیا گیا۔ نیوز ویب سائٹ’پروپاکستانی‘ کے مطابق یہ واردات میر علی میں واقع قصبے حکیم خیل میں ہوئی۔ فائرنگ سے قاسم شاہ نامی کرکٹر موقع پر ہی دم توڑ گیا جبکہ ایک نوجوان شدید زخمی ہو گیا۔ ملزمان فائرنگ کرنے کے بعد موقع سے فرار ہو گئے۔

(جاری ہے)

رپورٹ کے مطابق زخمی ہونے والا نوجوان بھی مقتول قاسم شاہ کا ساتھی کرکٹر ہے، جسے میر علی ہسپتال میں طبی امداد دی جا رہی ہے۔ قاسم شاہ علاقے کی معروف سماجی شخصیت پیر عاقل زمان کا بیٹا تھا۔ تاحال معلوم نہیں ہو سکا کہ ملزمان نے کھلاڑیوں کو کیوں نشانہ بنایا۔ پولیس نے واردات کا مقدمہ درج کر لیا ہے اور تحقیقات کی جا رہی ہیں۔