انگلینڈ کیخلاف سیریز کیلئے پاکستانی سکواڈ میں اہم کھلاڑی کی واپسی کا امکان

لاہور (اردو پوائنٹ تازہ ترین اخبار ۔ یکم مئی 2024ء ) دورہ آئرلینڈ اور انگلینڈ کے لیے قومی ٹیم کا اعلان کل بروز جمعرات کیا جائے گا جس میں حارث روف کی واپسی کا امکان ہے۔ پی سی بی کی جانب سے جاری اعلامیے میں بتایا گیا ہے کہ نیشنل سلیکشن کمیٹی دورہ انگلینڈ اور آئرلینڈ کیلئے پاکستان ٹیم کا اعلان کرے گی۔ پاکستان ٹیم 10، 12 اور 14 مئی کو آئرلینڈ کے خلاف ڈبلن میں میچز کھیلے گی جب کہ انگلینڈ کے خلاف میچز 22 ،25 ،28 اور 30 مئی کو کھیلے جائیں گے۔

(جاری ہے)

ذرائع کے مطابق ٹی ٹونٹی ورلڈ کپ کے لیے پاکستانی سکواڈ کا اعلان انگلینڈ کے خلاف پہلے میچ کے بعد متوقع ہے اور فاسٹ بولر حارث رؤف قومی سکواڈ میں جگہ بنائیں گے جب کہ عثمان خان کو بھی مزید موقع دیے جانے کا امکان ہے۔ حارث رؤف کندھے کی انجری کی وجہ سے ٹیم کا حصہ نہیں تھے، محمد رضوان پہلے سے بہت بہتر محسوس کر رہے ہیں اور وہ بھی ٹیم کا حصہ ہوں گے۔