پی ایس ایل 10 کے بقیہ میچز سے متعلق اتفاق ہوگیا

لاہور(اُردو پوائنٹ اخبارتازہ ترین - این این آئی۔ 13 مئی2025ء)پاکستان کرکٹ بورڈ (پی سی بی) اور پی ایس ایل فرنچائز نے پاکستان سپر لیگ 10 کے بقیہ میچز کیلئے 17 سے 25 مئی کی ونڈو پر اتفاق کرلیا ہے، حتمی مقام اور غیر ملکی پلیئر روسٹر پر بات چیت جاری ہے۔ذرائع کے مطابق پاک بھارت کشیدگی کی وجہ سے معطل ہوجانے والی پی ایس ایل کے بقیہ میچز مئی کے تیسرے ہفتے میں ہونے پر اتفاق ہوگیا ہے، یہ میچز اب 17 سے 25 مئی کی ونڈو کے دوران ہوں گے۔

پاکستان کرکٹ بورڈ کی تجویز ہے کہ میچز کا آغاز وہیں سے کیا جائے جہاں سلسلہ ٹوٹا تھا، یعنی راولپنڈی اور پھر اختتامی میچز لاہور میں ہوں بعض فرنچائز نے تجویز دی کہ لاجسٹک مسائل کی وجہ سے اگر ایک ہی وینیو رکھ لیا جائے تو بہتر ہوگا۔وینیو کے معاملہ پر براڈ کاسٹ پراڈکشن ٹیم سے مشاورت کے بعد حتمی فیصلہ ہوگا۔

(جاری ہے)

دوسری جانب فرنچائز نے پی ایس ایل کے بقیہ میچز کے لیے اپنے اپنے غیر ملکی پلیئرز سے رابطہ کیا ہے اور دستیابی پوچھی ہے، کچھ پلیئرز نے دستیابی ظاہر بھی کی ہے۔

تاہم ذرائع کا کہنا ہے کہ اگر غیر ملکی پلیئرز کا روسٹر مکمل نہ ہوا تو اس کے لیے دو تجاویز زیر غور ہیں۔ایک تجویز یہ ہے کہ ری پلیسمنٹ ڈرافٹ منعقد کیا جائے جبکہ دوسری تجویز یہ ہے کہ فائنل الیون میں غیر ملکی پلیئرز کی کم سے کم تعداد کے قانون میں معمولی تبدیلی کی جائیں۔تمام معاملات پر پی سی بی اور پی ایس ایل فرنچائز میں تبادلہ خیال جاری ہے اور جلد حتمی فیصلہ ہوجائے گا۔