میں نے پوری قوم کی طرف سے آرمی چیف کو پیار دیا، شاہد آفریدی

جس نے جو بات کرنی ہے کرے، میرے لیے یہ ملک سب کچھ ہے : سابق کپتان

ذیشان مہتاب منگل 20 مئی 2025 11:51

میں نے پوری قوم کی طرف سے آرمی چیف کو پیار دیا، شاہد آفریدی

لاہور (اردو پوائنٹ تازہ ترین اخبار ۔ 20 مئی 2025ء ) قومی ٹیم کے سابق کپتان شاہد آفریدی نے آرمی چیف جنرل عاصم منیر کو بوسہ دینے پر تنقید کرنے والوں کو کرارا جواب دے دیا۔

نجی ٹی وی سماء نیوز کے پروگرام میں بات کرتے ہوئے شاہد آفریدی کا کہنا تھا کہ ’میں نے آرمی چیف کو بوسہ دیا، پیار دیا، یہ میں نے قوم کی طرف سے آرمی چیف کو پیار دیا ہے، محلے کے اندر پالتو کتے بھونکتے رہتے ہیں تو عقلمندی یہی ہے کہ آپ ان کو بھونکنے دو۔

جس نے جو بات کرنی ہے کرے، میرے لیے یہ ملک سب کچھ ہے‘۔

واضح رہے کہ کچھ روز قبل ایک تقریب میں آرمی چیف جنرل عاصم منیر اور شاہد آفریدی کی گرمجوشی سے ملنے کی ویڈیو سامنے آئی تو پاکستانی عوام خوشگوار حیرت میں مبتلا ہو گئی جس انداز میں شاہد آفریدی نے آرمی چیف کا بوسہ لیا ، یہ دیکھ کر تمام پاکستانیوں نے ویڈیو کو خوب انجوائے کیا جبکہ بھارتی عوام غصے میں آپے سے باہر ہو گئی۔

(جاری ہے)

شاہد آفریدی حالیہ پاک بھارت کشیدگی کے بعد سے پاک فوج کی حمایت میں کھل کر اظہار کر رہے ہیں جس کے باعث بھارتی عوام انہیں شدید تنقید کا نشانہ بنا رہی ہے ۔

اب ان کی ایک نئی ویڈیو سامنے آئی ہے جس میں وہ لائن آف کنٹرول کے لیپہ سیکٹر میں کھڑے ہو کر پراٹھے کھا رہے ہیں ۔

یہ ویڈیو دیکھ کر پاکستانی عوام شاہد آفریدی کی حب الوطنی اور پاک فوج سے محبت کو سلام کر رہی ہے ۔

واضح رہے کہ شاہد آفریدی عوام اور پاک فوج سے اظہار یکجہتی کے لیے لائن آف کنٹرول پہنچے تھے۔

شاہد آفریدی کا وادی لیپہ میں شاندار استقبال کیا گیا، سابق کپتان نے یاد گار شہداء پر بھی حاضری دی۔ انہوں نے لیپہ کرکٹ گراؤنڈ میں نوجوانوں سے ملاقات کی اور دستخط شدہ بیٹ بال بھی تقسیم کیے۔

شاہد آفریدی کا میڈیا سے گفتگو میں کہنا تھا کہ کراچی سے پاکستانی عوام اوراپنی فیملی کی جانب سے لیپہ کے لوگوں کا شکریہ ادا کرنے آیا ہوں، اگر انڈیا نے دوبارہ سے جارحیت کی کوشش کی تو اسی طرح بھرپورجواب دیا جائے گا۔

وقت اشاعت : 20/05/2025 - 11:51:14