پہلے 14 ٹی ٹونٹی میچز میں زیادہ وکٹیں، صفیان مقیم نے سعید اجمل کو پیچھے چھوڑ دیا

صفیان مقیم پہلے 14 ٹی ٹونٹی میں زیادہ وکٹیں حاصل کرنے والے دوسرے پاکستانی باولر بن گئے

ذیشان مہتاب ہفتہ 30 اگست 2025 15:33

پہلے 14 ٹی ٹونٹی میچز میں زیادہ وکٹیں، صفیان مقیم نے سعید اجمل کو پیچھے چھوڑ دیا

شارجہ (اردو پوائنٹ تازہ ترین اخبار ۔ 30 اگست 2025ء ) قومی ٹیم کے لیفٹ آرم رسٹ سپنر صفیان مقیم پہلے 14 ٹی ٹونٹی میں زیادہ وکٹیں حاصل کرنے والے دوسرے پاکستانی باولر بن گئے۔

25 سالہ صفیان مقیم نے سہ ملکی ٹی ٹونٹی سیریز میں گزشتہ روز افغانستان کیخلاف میچ میں عمدہ باولنگ کا مظاہرہ کرتے ہوئے صرف 25 رنز دیکر 2 وکٹیں حاصل کیں۔

صفیان مقیم اب تک اپنے ٹی ٹونٹی کیریئر میں 12 کی شاندار اوسط اور 5.79 کے اکانومی ریٹ سے 23 وکٹیں اپنے نام کرچکے ہیں۔

پاکستان کے لیے پہلے 14 ٹی ٹونٹی میچز میں زیادہ وکٹیں لینے کا ریکارڈ عمر گل کے پاس ہے جنہوں نے 24 وکٹیں لی تھیں، عباس آفریدی اتنے ہی میچز میں 22 وکٹیں لیکر اس فہرست میں تیسرے جب کہ سعید اجمل، عثمان قادر اور شاداب خان 20،20 وکٹوں کے ساتھ مشترکہ طور پر چوتھے نمبر پر موجود ہیں۔

(جاری ہے)

واضح رہے کہ سہ فریقی سیریز کے پہلے میچ میں پاکستان نے افغانستان کو 39 رنز سے شکست دے دی۔

شارجہ میں کھلے گئے میچ میں افغانستان کی ٹیم 183 رنز کے تعاقب میں 19.5 اوورز میں 143 رنز بنا کر آؤٹ ہوگئی۔

افغانستان کی جانب سے کپتان راشد خان 39 رنز بنا کر نمایاں رہے۔ رحمان اللہ گربز 38، صدیق اللہ اٹل 23، درویش رسولی 21، ابراہیم زادران 9، مجیب الرحمان 4، محمد نبی 3 اور فرید احمد 1 رن کے انفرادی اسکور پر آؤٹ ہوئے جبکہ کریم جنت اور عظمت اللہ عمرزئی بغیر کھاتا کھولے پولین لوٹے۔

فضل حق فاروقی 1 رن بنا کر ناٹ آؤٹ رہے۔

پاکستان کی جانب سے حارث رؤف نے 4 کھلاڑیوں کو آؤٹ کیا۔ شاہین شاہ آفریدی، محمد نواز اور سفیان مقیم نے 2، 2 وکٹیں حاصل کیں۔

اس سے قبل پاکستان نے ٹاس جیت کر پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 182 رنز اسکور کیے۔

شاہینوں کی جانب سے کپتان سلمان آغا 53 رنز ناٹ آؤٹ بنا کر نمایاں رہے۔ صاحبزادہ فرحان 21، محمد نواز 21، فخر زمان 20، محمد حارث 15، فہیم اشرف 14، صائم ایوب 14 اور حسن نواز 9 کے انفرادی اسکور پر آؤٹ ہوئے۔

افغانستان کی جانب سے فرید احمد نے 2 جبکہ مجیب الرحمان، محمد نبی، کپتان راشد خان اور عظمت اللہ عمرزئی نے 1، 1 وکٹ حاصل کی۔

وقت اشاعت : 30/08/2025 - 15:33:04