ایشیا کپ کے اپنے پہلے میچ میں پاکستان نے عمان کو روند ڈالا

دبئی (اردو پوائنٹ تازہ ترین اخبار ۔ 12 ستمبر 2025ء ) ایشیا کپ کے اپنے پہلے میچ میں پاکستان نے عمان کو روند ڈالا۔ تفصیلات کے مطابق ایشیا کپ 2025 میں پاکستان ٹیم نے اپنی مہم کا آغاز آج عمان کے خلاف میچ سے کیا ہے جو دبئی اسٹیڈیم میں کھیلا گیا۔ پاکستان کے کپتان سلمان علی آغا نے ٹاس جیتنے کے بعد عمان کیخلاف پہلے بیٹنگ کرنے کا فیصلہ کیا۔ پاکستان عمان جیسی کمزور ٹیم کیخلاف بھی بڑا ہدف دینے میں ناکام رہا، ایشیاء کپ میں اپنے میچ میں پاکستانی بیٹنگ لائن مقررہ 20 اوورز میں 7 وکٹوں کے نقصان پر صرف 160 رنز بنا سکی۔

صاحبزادہ فرحان اور صائم ایوب نے اوپننگ کی جبکہ فخر زمان تیسرے نمبر پر بیٹنگ کیلئے آئے۔ ان کے بعد دیگر کھلاڑیوں میں سلمان علی آغا (کپتان)، حسن نواز، محمد حارث، محمد نواز، فہیم اشرف، شاہین آفریدی، حارث رؤف اور ابرار احمد شامل تھے۔

(جاری ہے)

جواب میں عمان کی پوری ٹیم محض 67 رنز بنا کر پویلین لوٹ گئی۔ عمان کو بڑے مارجن سے شکست دینے کے باعث پاکستان نے پوائنٹس ٹیبل پر اپنا نیٹ رن ریٹ بھی بہتر کر لیا۔

خیال رہے کہ دبئی کی پچ کو ابوظہبی کے مقابلے میں زیادہ اسپن فراہم کرنے والی سمجھا جا رہا ہے، جو اس ٹورنامنٹ کا دوسرا وینیو ہے۔ یہاں یہ بات قابل ذکر ہے کہ آج عمان کے خلاف میچ پاکستان ٹیم کے لیے نہ صرف پوائنٹس ٹیبل پر اہمیت رکھتا تھا بلکہ دبئی کی کنڈیشنز میں کھیلنے کا ایک قیمتی موقع بھی فراہم ہوا جو اتوار کو بھارت کے خلاف میچ سے قبل کنڈیشن سمجھنے پر مدد فراہم کرے گا۔

پاکستان ٹیم کا بولنگ کمبی نیشن کرکٹ حلقوں میں خاص توجہ کا مرکز بنا ہوا ہے کیونکہ ٹرائی نیشن سیریز میں صفیان مقیم اور ابرار احمد سمیت محمد نواز نے خطرے کی گھنٹی بجا دی ہے۔ دبئی میں پاکستان کا ٹی ٹونٹی کرکٹ میں حالیہ ریکارڈ کچھ اچھا نہیں ہے۔ پاکستان نے یہاں پر گذشتہ پانچ ٹی ٹونٹی میچز میں سے صرف ایک میں فتح حاصل کی ہے جو بھارت کے خلاف 2022ء کے ایشیا کپ میں تھی۔

میچ سے قبل پاکستان کرکٹ ٹیم کے ہیڈ کوچ مائیک ہیسن نے دبئی کی پچ کا معائنہ کیا اور پریس کانفرنس میں اُسے بیٹرز کیلئے سازگار قرار دیا، ہیسن کا کہنا تھا کہ پاکستانی ٹیم میں ملٹی اسکلز کھلاڑی موجود ہیں۔ دوسری جانب عمان کی ٹیم کے کپتان جدیندر سنگھ نے پریس کانفرنس میں کہا کہ پاکستانی ٹیم کا عمان سے کوئی مقابلہ نہیں ہے مگر ٹی 20 فارمیٹ میں کچھ بھی ہوسکتا ہے۔