یوم آزادی پر پی سی بی کی جانب سے قذافی اسٹیڈیم میں پروقار تقریب کا انعقاد

لاہور (اُردو پوائنٹ اخبارتازہ ترین - اے پی پی۔ 14 اگست2026ء) یوم آزادی کے موقع پر پاکستان کرکٹ بورڈ کی جانب سے قذافی اسٹیڈیم لاہور میں ایک پروقار تقریب کا انعقاد کیا گیا، جس میں پاکستان کی آزادی کی خوشی اور قومی جذبے کا بھرپور اظہار کیا گیا۔ تقریب میں پاکستان کرکٹ بورڈ کے چیف آپریٹنگ آفیسر سمیر احمد سید نے بطور مہمان خصوصی شرکت کرتے ہوئے قومی پرچم لہرایا اور یوم آزادی کی مناسبت سے کیک بھی کاٹا۔

تقریب کے دوران پاکستان کی سلامتی، ترقی اور خوشحالی کے لیے نیک خواہشات کا اظہار کیا گیا، جبکہ شرکاء نے ملک سے محبت اور قومی یکجہتی کے عزم کا اعادہ کیا۔ قذافی اسٹیڈیم میں منعقدہ تقریب کے موقع پر قومی پرچم کی موجودگی اور جشن آزادی کی مناسبت سے سجائی گئی جگہ نے ماحول کو مزید خوبصورت اور پروقار بنا دیا۔

(جاری ہے)

پاکستان کرکٹ بورڈ کے افسران و ملازمین سمیت ان کی فیملیز نے بھی تقریب میں بھرپور شرکت کی۔

پی سی بی اسٹاف اور ان کے اہل خانہ نے یوم آزادی کی خوشیوں میں شریک ہوتے ہوئے قومی جذبے کے ساتھ تقریب کو یادگار بنایا۔ ۔چیف آپریٹنگ آفیسر سمیر احمد سید نے پرچم کشائی اور کیک کاٹنے کی تقریب میں پی سی بی کی جانب سے پوری قوم کو جشن آزادی کی مبارکباد پیش کی۔ پاکستان کرکٹ بورڈ نے اپنے پیغام میں کہا کہ یوم آزادی ہمیں اپنے بزرگوں کی لازوال قربانیوں اور جدوجہد کی یاد دلاتا ہے، جبکہ یہ دن ملک کی ترقی، اتحاد اور خوشحالی کے لیے نئے عزم کے ساتھ آگے بڑھنے کا پیغام بھی دیتا ہے۔

تقریب میں موجود پی سی بی کے اسٹاف اور ان کے اہل خانہ نے اس عزم کا اظہار کیا کہ پاکستان کی ترقی، وقار اور سربلندی کے لیے ہر سطح پر اپنا کردار ادا کرتے رہیں گے۔ یوم آزادی کے موقع پر منعقدہ اس تقریب نے قومی جذبے، اتحاد اور وطن سے محبت کے جذبات کو مزید اجاگر کیا۔ پاکستان کرکٹ بورڈ کی جانب سے ایک بار پھر پوری قوم کو یوم آزادی کی دلی مبارکباد پیش کی گئی۔