گرمیاں اور گاؤں

ہمارے گھر میں ہمیشہ سے ایک کمرہ امتحان جیسی نگرانی کا ماحول رہا ہے جس کی روٹین میری بورڈ میں انٹری یعنی نویں جماعت سے یکساں ہے کہ ناشتے کے فوراً بعد کتابیں اٹھا لینی ہیں، کسی بھی مضمون کے حل طلب سوالات کی مشق بنا چون و چراں شروع کر دینی ہے اور پھر اس کے بعد رٹہ لگا کر نصاب کے ہر مضمون کو باری باری ایک گلاس پانی کے ساتھ گھول کر پی جانا ہے اور اس کے بعد امتحانی کمرے میں جوابی پرچے پر الٹ کر آ جانا ہے جس کا میں میٹرک کے امتحانات میں اعلیٰ نمبر لے کر کامیاب تجربہ کر چکی ہوں، یہ الگ بات کہ مجھے اب تک ریاضی کی نہ تو سمجھ ہے اور نہ ہی اس میں کوئی دلچسپی جس میں خاص طور پر سو فیصد نمبر لئے-
اس سخت ماحول کے باوجود ہماری ماں ہمیں ٹی وی پر ایک ڈرامہ روزانہ ضرور دیکھنے دیتی ہیں جس کا انتخاب بھی ان کی ہٹلر نما طبیعت ہی کا استحقاق ہے مگر اس جبر پر ہم اسلیے خاموش رہتے ہیں کیونکہ ایک دو اقساط کے بعد وہ ڈرامے کی کہانی ہمیں اچھی لگنے لگتی ہے اور اس کے ذریعے ہماری والدہ ہمیں زمانے کے وہ رویے دکھا دیتی ہیں جو عام طور پر ہماری نظر سے اوجھل رہتے ہیں، یوں انہوں نے ہمیں بہت سی وہ غلطیاں سکرین پر دکھا دیں جن کو خود کر کے وقت ضائع کر نے کی بجائے دوسروں کے تجربات سے فائدہ اٹھایا جا سکتا ہے-
کل ہم لوگ روٹین ک مطابق ڈرامہ آور میں ڈرامہ دیکھ رہے تھے کہ ڈرامے کے کردار میں ایک عورت بار بار یہ کہہ کر رو رہی تھی، 'ہاے میری بوری مر گئ' ، 'ہاے اب میں بوری کے بغیر کیسے رہوں گی'، 'ہاے میری بوری'، 'ہاے میری بوری' ، 'ہاے میں اجڑ گئ بوری'- میں اس کے رونے دھونے سے یہ سمجھی کہ بوری اسکی ماں ہے، جیسے ہی میں نے اس نادر خیال کا اظہار کیا تو میری والدہ کی ہنسی نکل گئی اور انہوں نے ہنستے ہوئے بمشکل مجھے بتایا کہ بوری دیہات میں اس بھینس کو کہتے ہیں جسکا رنگ بھورا ہوتا ہے اور چونکہ مویشیوں سے دیہات کے لوگوں کو بہت لگاؤ ہوتا ہے، انکے معیشت کا انحصار فصلوں اور مویشیوں پر ہوتا ہے تو اس لگاو اور نقصان پر یہ عورت اسقدر رو رہی ہے کہ دیکھنے والے کوگمان ہوا کہ اسکی ماں مر گئ ہے-
پچھلے سال ہم لوگ پاکستان گئے تو گاؤں پہنچتے پہنچتے رات ہو گئی، رات چاندنی تھی، کسی گھر کے باہر ایک خچر عین دروازے کے سامنے بندھا ہوا تھا تو ہم سمجھے کہ یہ مجسمہ ہے، ابھی ہم اس سحر میں گرفتار تھے کہ گاؤں کے لوگ کتنے اعلیٰ ذوق ہیں کہ گھروں کے سامنے اتنے بڑے بڑے مجسمے لگا رکھے ہیں مگر ہماری حیرت اس وقت چیخ کی شکل اختیار کر گئی جب وہ خچر اپنا سر ہلا کر اپنے اوپر سےمچھر اڑانے کی کوشش کرنے لگا، اس کے علاوہ بھی ہمیں وہاں بہت سی چیزوں نے محظوظ کیا کہ دادی اماں کے آس پاس بہت سی مانوس پالتو بلیاں پھرتی رہتی تھیں اور ہم انہیں ہاتھ بھی لگاتے تو ڈرتی نہیں تھی، دادی کے گھر سے منسلک ایک صحن میں خوب بڑے بکرے بندھے ہوئے تھے کہ قربانی کا دن قریب تھا اور ان کی بطور مہمان خوب ہری بھری گھاس سے خاطر ہوتی تھی، بچے بڑے سب ان کو ہاتھ سے چارا کھلاتے تھے، ہمارے تایا ابو کا سرکاری گھر ایک فارم ہاؤس کیطرح تھا، جب ہم باہر نکلتے تو مینڈک اچھل اچھل کر لان میں ادھر ادھر مستیاں کرتے تو ہمارے لئے یہ نظارہ نیا تھا اور ہم ڈر کر جلدی سے وہاں سے آگے بھاگ جاتے-  دادی کے گھر میں آنے کیلئے لوگ پہلے فون نہیں کرتے بلکہ سیدھا آ جاتے کہ گاؤں میں لوگ تکلف سے بالاتر زندگیاں گزارتے ہیں جس کے کچھ فایدے اور نقصانات ہیں مگر لوگ سادہ اور پر خلوص ہیں کہ لوڈ شیڈنگ ہو جانے پر ایک ہی درخت کی چھاؤں تلے اکٹھے بیٹھ جاتے ہیں- گاؤں کے لوگوں کی اپنے مویشیوں کیلئے محبت دیدنی ہوتی ہے، اگر کوئی جانور بیمار ہو جائے تو ان کی جان پر بن جاتی ہے _ اور جانور بھی اپنے مالک کو پہنچانتے اور انکو دیکھ کر مخصوص حرکات سے اپنی خوشی کا اظہار کرتے ہیں-
العربیہ ڈاٹ نیٹ کے مطابق پالتوں جانوروں کا اپنے مالک سے محبت کا عدیم النظیر مظاہرہ حال ہی میں سعودی عرب میں دیکھا گیا۔

(جاری ہے)

یہ واقعہ ایک اونٹنی کا ہے جسے اس کے پہلے مالک نے محمد بن شویشان السبیعی نے ایک دوسرے شخص کو فروخت کردیا تھا۔ الشویشان نے بتایا کہ سات ماہ بعد اس نے اونٹوں کی ایک ریس میں شرکت کی۔ اس ریس میں الشیخ عبدالمحسن الراجحی نے مجھ سے خریدی گئی اونٹنی بھی شامل کر رکھی تھی-
دوستوں نے بتایا کہ اونٹنی نے میری آواز سن کر مجھے پہچان لیا اور گاڑیوں کے بیچ میں سے نکلتے ہوئے میرے پاس آ پہچنی۔

اونٹنی نے اپنی لمبی گردن اٹھائی اور مجھے اس میں لپیٹ لیا۔ اس کی آنکھوں سے آنسو جاری تھے- الشویشان کا کہنا تھا کہ ہم لوگ جانوروں کو صرف اپنی اغراض کے لیے پالتے ہیں۔ ان کے جذبات کا قطعی خیال نہیں رکھتے ہیں حالانکہ جانور بھی محبت کے جذبات رکھتے ہیں-
ہمارے گاؤں میں کچھ مکان مٹی سے بنے تھے، ہم بہت حیران ہوے، ایسے لگ رہا تھا، یہ اس کھیلنے والی مٹی Playing Clay سے بنے ہیں جو ہم کھیلنے کیلئے شاپنگ مال سے لاتے ہیں-
پاپا کچھ دن پہلے اپنے پنجابی دوست شاہد شبیر جو کہ آجکل پنجابی روایت کے احیاء کیلئے سرگرم ہیں سے باتیں کرتے کرتے اس قدر آبدیدہ ہوگئے کہ گھر کا سارا ماحول ناسٹالجک ہو گیا، پاپا اپنے دادا جو کہ گاؤں کے نمبردار تھے کے ڈیرے کے قصے، پگڑی کے انداز اور اس وقت کے رکھ رکھاؤ کو یاد کرنے لگے، اماں بھی وقت کی دھول میں کھوئ ہووے رستوں اور کھو جانے والے قصوں کو اپنی شاعری میں یوں بیان کرنے لگیں :