کاسمیٹکس اور خطرناک کیمیکلز کی آمیزش

جمعرات 21 جنوری 2021

Roohi Bano Obaid

روحی بانو عبید

1۔ جب جلد پر لگائ جانے والی کریم نے سر کے بال مستقل غائب کر دیئے تھے۔ کچھ  خواتین فالج کا شکار بھی ہوئیں اور کچھ کی بینائی کو بھی نقصان پہنچا۔ بدقسمتی سے صارفین زہر استعمال کر رہے تھے۔ یہ لگ بھگ نوے (90) سال قبل کا امریکہ کا قصہ ہے۔ "کوریملو" نامی کریم نے خود کو ایک محفوظ اور مستقل بال ہٹانے والی سنگھار کے طور پر متعارف اور مشتہر کیا۔

اس میں ایک کیمیکل تھیلیئم ایسیٹیٹ بھی شامل تھا یہ کیمیکل چوہوں کو مارنے کی قوت کی وجہ سے چوہے مار زہر کے طور پر استعمال ہوتا تھا۔ اس کے زہر کی شدت دوسرے جانوروں کے علاوہ انسان کو بھی حادثاتی طور پر اکثر ناقابل تلافی نقصان سے دوچار کردیا کرتی تھی۔ اور اسی وجہ سے اسکا استعمال چوہے مار زہر کے طور پر روک دیا گیا تھا ۔

(جاری ہے)

لیکن کاسمیٹکس میں اس کے استعمال پر اس وقت امریکہ میں پابندی لگانے کا کوئی اختیار نہ تھا۔

ہمیں اپنا خیال خود رکھنا ہے ۔ تھیلیئم ایک زہر ہے۔ معلومات کے بغیر کیمیکل سے بنی چیزوں کو استعمال کرنے سے گریز کریں۔
2۔ آنکھوں کی بینائی گئی، کسی کے چہرے پر آبلے پڑے اور متعدد کے چہروں کو زخموں اور پھوڑوں نے گھیر لیا۔ پلکوں کو حسین رکھنے اور دلکش بنانے کی خواہش نے ہولناک نقشہ کھینچ دیا تھا۔ یہ تقریبا صدی پرانا سانحہ ہے جب کاجل بازار میں لانے والوں نے اسے پلکوں کو خوبصورت بنانے کے وعدوں کے ساتھ اس کی خاصیت کا ڈنکا بجایا۔

امریکہ کے گوشہ گوشہ میں اس کی گونج سنائی دے رہی تھی۔ کسے خبر تھی کہ بدقسمتی نقب زنی پر تلی بیٹھی ہے۔ کاجل میں شامل مہلک کیمیائی جزو نے اپنا اصل سیاہ رنگ دکھا دیا تھا۔ بعض چہروں کے زخموں کا اختتام اتنا شدید تھا کہ ایک خاتون کی موت اسی حادثے سے منسوب ہے۔ زندہ قوم کا شعور اور اجتماعی ردعمل سائنس کے ساتھ رواں دواں تھا اور یوں اس مہلک کاجل میں شامل غیر محفوظ کیمیائی جزو اور اس جیسے اجزاء کے استعمال سے پیوستہ حادثات امریکہ میں کاسمیٹکس کو قانون سازی کے دائرے میں لانے کا موجب بنے۔

1938 میں قانون کے نافذ العمل ہونے کے بعد اس کاجل کو دکانوں سے بزور ہٹا دیا گیا۔ لب لباب یہ ہے کہ مکمل معلومات کے بناء کوئی بھی چیز استعمال کرنے سے گریز کرنا چاہئے بلخصوص جس میں کیمیکل شامل ہوں ان کے محفوظ ہونے کی تصدیق کی جستجو کرنی چاہیے۔  
3۔ خوبصورت کرنے والی جادوئی کریم نے جب امریکہ کے کسی گھر میں سانحہ برپا کردیا۔ تقریبا صدی پہلے "گوراڈ اوریئنٹل کریم" کے نام سے جلد کو حسین بنانے والی پروڈکٹ نے بدترین دشمنی کا اظہار کیا۔

آنکھوں اور گردن کے گرد سیاہ حلقوں کے ساتھ مسوڑھوں کو نیلا اور گدلا بناتے ہوئے دانتوں کو کمزور کررہی تھی جبکہ لوگ بخوشی استعمال کررہے تھے ۔ یہ نقصان دہ اثرات کچھ نہیں مرکری کا زہر پن ہے، جو کہ کریم میں استعمال ہونے والے کیمیائی جزو کیلومل سے وابستہ ہے۔ مرکری کے مرکبات یا مرکری کی آمیزش پر انحصار ناقابل تلافی نقصان سے دوچار کرسکتا ہے۔

مرکری ہمارے اعصابی، مدافعتی، تنفسی نظام اور گردوں وغیرہ پر حملہ آور ہوتا ہے۔ اس سے بہت دور رہیں۔ صرف کھانے پینے کی کوالٹی کے بارے میں نہیں بلکہ دواوں اور کاسمیٹکس میں استعمال ہونے والے اجزاء کا بھی مطالعہ کیا کریں۔ یہ لیبل پر تحریر ہوتا ہے۔  سوالیہ نشان پر یا نامعلوم پر کبھی بھروسہ نہ کریں۔ اپنی اور اپنے چاہنے والوں کی صحت اور تحفظ کے لئے اپنا کردار ادا کریں، چاہے وہ کتنا ہی معمولی کیوں نہ ہو۔

ادارہ اردوپوائنٹ کا کالم نگار کی رائے سے متفق ہونا ضروری نہیں ہے۔

تازہ ترین کالمز :

متعلقہ عنوان :