جہیز رسم ہے یا جائز مگر کیسے؟

کچھ دنوں سے جہیز کا موضوع زیرِ بحث ہے تو اِس حوالے سے جب معلومات حاصل کیں تو جہیز کے حوالے سے اسلامی روایات اور رسمی حقائق کے حوالے سے پتہ چلا، زیادہ تر افراد جہیز کی روایت کو اچھا نہیں سمجھتے اور اسلام بھی جہیز جیسی رسم سے منع کرتا ہے، لیکن بعض لوگ اِس روایت کو مخلتف پہلووں سے دیکھتے ہیں اور جہیز کی رسم کوبہتر سمجھتے ہیں، یہ وہ لوگ ہیں جن کی نظر میں جہیز دینا انسان کے حالات پر ہی منحصر ہے،
ہمارے ہاں بہت سی روایات ایسی بھی ہیں جو صرف دکھاوے کے لیے ہی بنائی گئی ہیں، جو اگر نہ ہوتیں تو شاید زیادہ بہتر ہوتا لیکن چند لوگوں نے اپنی ٹھاٹ باٹ کو برقرار رکھنے کے لئے اِن کو پروان چڑھایا، جہیز بھی اِن روایات میں سے ایک ہے، ہمارے معاشرے میں یہ روایت اِس حد تک عام ہو چکی ہے کہ جس کو ختم کرنا ناممکن سا لگتا ہے کیونکہ آجکل کے دور میں یہ فیشن بن کر عام ہو چکا ہے اور شادی سے پہلے لڑکی والوں کی طرف سے پہلا قدم جہیز بنانا ہی ہوتا ہے، ایسی رسم کو پروان چڑھانے اور برقرار رکھنے میں امراء کا بہت اہم کردار ہے جو اپنی بیٹی کی خوشنودی سے بڑھ کر لوگوں کو دکھانےکیلئے پیسوں کا بے دریغ استعمال کرتے ہیں اور یوں جہیز کی رسم انسانوں کی بستیوں میں جنگل کی آگ کی طرح پھیل چکی ہے جو مسلسل پھیلتی جارہی ہے ،یقیناً اِس رسم نے غرباء ومساکین کی زندگی کو کافی متاثر بھی کر رکھا ہے لیکن وہیں امیر خاندانوں نے دکھاوے کو برقرار رکھنے کے لئے جہیز جیسی بیماری کو پروان چڑھانے میں کوئی کسر نہیں چھوڑی، جہیز کے حوالے سے کچھ حقائق ایسے بھی ہیں جن کو سمجھنا بھی ضروری ہے،
اگر لڑکی کے والدین اپنی بیٹی اور داماد کی خوشنودی کے لئے سازوسامان کا بندوبست کرتے ہیں، یہاں تک کہ اُن کو لڑکے والوں کی طرف سے روکا بھی جاتا ہے کہ وہ جہیز کا بندوبست نہ کریں لیکن لڑکی کے والدین جہیز دینے پر بضد ہوتے ہیں۔

(جاری ہے)

اُن کی طرف سے عموماً یہ دلیل پیش کی جاتی ہے کہ وہ اگر جہیز کا بندوبست کرتے بھی ہیں تو اِس میں اُن کی رضا شاملِ حال ہوتی ہے کیونکہ وہ یہ چاہتے ہیں کہ اُن کی طرف سے اپنی بیٹی کے لئے جہیز کا بندوبست کرنے کے بعد اُن کی بیٹی کی زندگی میں کافی آسائشیں شامل ہو جائیں گی اور وہ اِسے تحفے کا نام بھی دیتے ہیں، اسلئے اِس عمل پر اعتراض بھی نہیں کیا جا سکتا کیونکہ والدین کی طرف سے بیٹی اور داماد کو تحائف دینے میں کوئی ممانعت نہیں ہے اور والدین اپنی بیٹی کو زندگی کے کسی موڑ پر تحائف دے سکتے ہیں ، یہاں یہ بات بھی ذہن نشین کر لینی چاہیے کہ اگر لڑکی والے لڑکے والوں کی طرف سے روکنے کے بعد جہیز نہیں دیتے تو لڑکے والوں کو چاہیے کہ زندگی میں کسی لمحے بھی جہیز نہ دینے کا طعنہ مت دیں تاکہ لڑکی کے والدین کی دل آزاری نہ ہو، لیکن اگر لڑکی کے والدین اپنی بیٹی اور داماد کی خوشنودی کیلئے اپنی بساط کے مطابق جہیز کا بندوبست کرتے ہیں تو اِسے بھی خوشی خوشی قبول کر لینا چاہیے،
ہمارے لئے رسول صلی الله عليه و آلہ وسلم کی زندگی عملی نمونہ ہے، آپ صلی الله عليه وسلم نے اپنی کسی بیٹی کی شادی کرتے وقت اُن کو جہیز نہیں دیا، اِس لیے اسلام میں جہیز کو ناپسند کیا گیا ہے، لیکن ایک روایت میں آتا ہے کہ آپ صلی اللہ علیہ وآلہ وسلم نے اپنی بیٹی کو چند اشرفیاں بطور ضرورت دیں لیکن یہ عمل بھی چپکے سے ہی ہونا چاہیے تاکہ کسی دوسرے کو پتہ نہ چل پائے اور یہ عمل دکھاوے کے زمرے میں نہ آئے، اگر ہمارے پیارے نبی اکرم صلی الله عليه وسلم اور اُن کا گھرانہ جہیز کی رسم کے حوالے سے اِس قدر محتاط تھے تو اُن کی زندگی ہمارے لئے عملی نمونہ ہونی چاہیئے ۔

اگر اسلامی اصولوں کو مدِنظر رکھتے ہوئے دیکھا جائے تو یہاں جہیز کے عمل کو ناپسند اور حقِ مہر کو جائز کہا گیا ہے لیکن ہمارے معاشرے میں یہ حقیقت بھی یکسر بدل چکی ہے جہاں لڑکی والوں سے لاکھوں کے جہیز کی ڈیمانڈ یا خواہش لگا کر لڑکے والوں کی طرف سے چند ہزار حقِ مہر دیے جاتے ہیں جو کہ اسلامی اصولوں کے منافی ہے .اصل بات یہی ہے کہ اگر لڑکی کے والدین اپی بساط کے مطابق جہیز کا بندوبست نہیں کر پاتے تو لڑکے والوں کو کسی صورت جہیز کی ڈیمانڈ نہیں کرنی چاہئے تاکہ لڑکی کے والدین اخراجات کے بوجھ سے محفوظ رہیں اور لڑکے کو ہسی خوشی اپنا گھر بسانا چاہیے نہ کہ جہیز کا لالچ دل میں لے کر بیٹھ جائے، اِس لیے اب یہ ہم پر ہی منحصر ہے کہ ہم نے جہیز کو لعنت ہی بنانا ہے یا اِس رسم کو ختم کرنا ہے کہ جب تک لڑکی والوں کی طرف سے لاکھوں میں جہیز نہیں دیا جائے گا، شادی نہیں ہوگی۔

۔