ابنِ آدم یا حیوان

میرا قلم آج جس موضوع پر حرکت میں آیا ہے وہ اس قدر سنجیدہ ہے کہ اگر میں نہ لکھتی تو میرا ضمیر مجھے ملامت کرتا رہتا ۔ "یہ ایک سوال جو بار بار میری روح کو جنھجھوڑتا ہے مسلمان ہونا تو دور کیا ہم انسان ہیں"
ہمارا ملک پاکستان جو کہ ایک اسلامی جمہوریہ ہے درحقیقت یہاں انسان نہیں بلکہ حیوان بستے ہیں۔ ایسے حیوان جن کی رگوں میں خون کی جگہ بے رحمی اور حیوانیت دوڑتی ہے۔

ہمیں اپنے معاشرے میں جانوروں کے حقوق اور تحفظ پر آواز اٹھاتے لوگ تو دیکھائی دیتے ہیں مگر انسانیت کے لیے آواز اٹھانے والا کوئی نہیں۔ ننھی جانوں کی سسکیاں سننے والا کوئی نہیں۔ ہم خود کو جس مذہب کا پیروکار کہتے ہیں وہ تو سراپا رحم دلی اور محبت کا نام ہے تو پھر کیوں آئے دن ننھی کلیوں کو پیروں تلے روند دینے کی خبریں دکھائی دیتی ہیں۔

(جاری ہے)

سگے رشتے اپنی ہی عزتوں کی دھجیاں بکھیرتے ہیں کیا یہ انسانیت کی تذلیل نہیں؟ سات سالہ زینب کی طرح حال ہی میں ایک اور ننھی جان کو جنسی ذیادتی کا نشانہ بنا کر قتل کر دیا گیا۔ ایسی قوم جو اپنی عزتوں کو پامال کرے کیا اسے انسان کہنا جرم نہیں؟
ہم صرف اور صرف ذہنی مفلوج قوم بن کر رہ چکے ہیں۔ ایک بے رحم اور مفلوج قوم جو بھوکے گِدھ کی مانند اپنی ہی عزتوں کو نوچ نوچ کر کھا رہی ہے۔

اخر کیوں نہ آئے ایسی قوم پر عذابِ الہیٰ کیا ہمارے رب نے ان ننھی جانوں کی آہوں اور سسکیوں کو نہیں سنا ہو گا۔ ان واقعات پر اتنی خاموشی کیوں، کیا ہم ظالم ہیں یا مظلوم، قاتل ہیں یا مقتول، منصف ہیں یا مجرم؟ اس کا فیصلہ میں آپ پر چھوڑتی ہوں۔ کلمہ طیبہ اور دو قومی نظریے پر بننے والا یہ ملک افسوس آج ظلم و حیوانیت کی پناہ گاہ ہے۔ کیا ان 73 سالوں میں ہم اپنی عزتوں کو تحفظ دینے میں کامیاب ہو سکے ہیں ذرا سوچئے گا!
حکامِ بالا سے درخواست کے سوا اور کر بھی کیا سکتی ہوں میں کہ ان درندوں کو سرِعام موت کے گھاٹ اتار کر عبرت کا نشانہ بنایا جائے تاکہ آنے والی ہر ذینب محفوظ رہ سکے۔

"ہم انسان ہیں یا حیوان" ، یہ سوال تب تک خود سے کیجیئے گا جب تک کہ آپکا ضمیر چیخ چیخ کر نہ کہے کہ ہاں میں ایک انسان ہوں۔ یہ محض لفظوں کی جنگ نہیں بلکہ حقیقت کی عکاسی ہے اور ایک اُمید ہے میرے دل میں کہ کاش میرا قلم تبدیلی کی راہ میں کوئی کردار ادا کر سکے۔