غریب کی کوئی عزت نہیں

جیسا کے ہم سب جانتے ہیں کہ اگر ہم دنیا کے شانا بشانا چلنا چاہتے ہیں تو اس کے لیے ضروری ہے کہ ہماری نظر ہر اس خبر پر ہو جو ہمارے گردونواح میں ہو رہا ہے۔ اسی سلسلے میں کل رات سونے سے قبل میں بھی سوشل میڈیا پے چلنے والی خبروں پے نظر دوڑا رہی تھی کہ اچانک مجھے ایک وڈیو نے جھنجھوڑ کر رکھ دیا۔ کیا دیکھتی ہوں کہ ایک ننھی پری کو ایک مرد بے دردی  سے تھپڑ رسید کر دہا تھا اور ساتھ میں اس کی بیوی اور تمام اہلِ خانہ نے بھی تابڑ توڑ مکے اور تھپڑ رسید کیے۔

ہر دوسرے پیج پر یہ وڈیو وائرل ہو چکی تھی۔ مزید چھان بین کرنے پر معلوم ہوا کے یہ ننھی پری جس کی عمر گیارہ برس ہے ان کے گھر کی ملازمہ ہے۔ یہ پری دھکوں اور مار پیٹ کی وجہ سے بار بار سڑک پر گر رہی تھی۔ کوئی راہگیر اس بچی کی مدد کرتا دیکھائی نہیں دے رہا تھا۔

(جاری ہے)

ان امیروں کو کون بتائے کے قیمتی لباس زیب تن کر کے انسان قیمتی نہیں ہو جاتا انسان کی قیمت اس کی انسانیت سے ہوتی ہے۔

یہ واقعہ فیصل آباد کے علاقے کنال روڈ کا ہے۔ مگر گھریلو ملازمین پر تشدد کا یہ کوئی پہلا واقعہ نہیں ہے۔ آئے روز ہمیں اس طرح کے واقعات دیکھنے اور سننے کو ملتے ہیں مگر افسوس ہم مردہ قوم ہیں ہمارے اندر کی انسانیت تو کب کی مر چکی ہے۔ اس سے قبل بھی راولپنڈی کے علاقے بحریہ ٹاؤن میں ایک گھریلو ملازمہ تشدد کا شکار ہو چکی ہے مگر افسوس کے ساتھ کہنا پڑتا ہے کے اس ملک کے قانون اس طرح کے بنائے گئے ہیں کہ اگر امیر کوئی غلطی کرتا ہے تو وہ دے دلا کے اپنی جان چھڑوا لیتا ہے مگر غریب کی کوئی عزت نہیں ہے۔

کہنے کو تو پاکستان ایک اسلامی ملک ہے اور اسلام کے نام پر بنا ہے مگر آئے روز ہمیں یہاں جنسی جرائم اور گھریلو تشدد کے واقعات میں اضافہ ہوتا دیکھائی دیتا ہے۔ جن غریب لوگوں پر یہ قیامت ٹوٹتی ہے وہ ذہنی امراض کا شکار ہوتے دیکھائی دیتے ہیں۔
یہاں ہمیں لبرل لوگ خواتین کے حقوق کے لیے آواز بلند کرتے دیکھائی دیتے ہیں مگر ان میں سے پچانوے فیصد اپنے گھر کی ملازموں کو تحفظ اور وقت پر تنخواہ نہیں دیتے۔

معاشرے میں بڑھتی مہنگائی نے غریب طبقے کو پیس کر رکھ دیا ہے جس کے نتیجے میں ان ننھے بچوں کو مزدوری کرنی پڑی ہے۔ اب تو غریب طبقے کے حالات مزید خراب ہو گئے ہیں کورونا وائرس کی وجہ سے بے روزگاری مزید بڑھ گئی ہے۔ زرائع آمدن نہ ہونے کے برابر ہو گئے ہیں۔ اب بتائیں کے غریب کیا کھائے کیا اور کیا پہنے؟
غریب طبقے کے تحفظ کی ذمہ دار ہماری حکومت ہے۔

1973 کے آئین کے تحت ملک میں غریب عوام کو تحفظ فراہم کرنے کا عہد کیا گیا ہے۔ مگر ہمارے ہاں الٹی گنگا بہتی ہے۔ کوئی حکومتی ادارہ غریب کی فکر نہیں کرتا تبھی تو ننھی پری کو فیصل آباد کی کنال روڈ پر تشدد کا نشانہ بنایا جاتا ہے۔ پہلے چالیس گھنٹے تک تو ہماری محافظ پولیس ایف آئی آر درج نہیں کرتی۔ کیا یہ پولیس ہماری محافظ ہے بھی یا نہیں؟ کیا غریب کی کوئی عزت ہے یا نہیں؟ اس کا فیصلہ عوام خود کریں۔
میری دعا ہے کہ اللہ تعالیٰ ہم پے رحم کریں اور ہر بچے کو اپنے حفظ و امان میں رکھیں آمین۔