سارا جھگڑا 18ویں ترمیم کا ہے، سابق صدرآصف زرداری

لاہور(اُردوپوائنٹ اخبارتازہ ترین۔27 اکتوبر 2018ء) پاکستان پیپلزپارٹی کے شریک چیئرمین آصف زرداری نے کہا ہے کہ سارا جھگڑا18ویں ترمیم کا ہے، یہ اٹھارویں ترمیم کو ختم کرنا چاہتے ہیں، یہ ٹریڈنگ اکاؤنٹس کو جعلی کہتے ہیں، سمجھ نہیں آتی ایف آئی اے ڈیڑھ کروڑ کا کیس کیوں ڈال رہی ہے،مسئلہ مجھ سے ہے گرفتاریاں دوستوں کی کررہے ہیں۔انہوں نے آج یہاں لاہور میں میڈیا سے گفتگو کرتے ہوئے بتایا کہ عوام سے بوجھ کم ہوگا توہمیں کوئی اعتراض نہیں ہے۔

شہید ذوالفقاربھٹو نے شاہ فیصل سے دوستی رکھی تھی۔ سعودی عرب نے ہمیشہ پاکستان کی مدد کی۔چین کے ساتھ ہمارے دوستانہ تعلقات ہیں پاک چین دوستی کیلئے کچھ ہمارا بھی کردار ہے۔انہوں نے ایک سوال پر کہا کہ 30سال سے میری کردار کشی کی جارہی ہے۔

(جاری ہے)

سندھ میں ایک گروپ کو سپورٹ کیا اس پر قیامت ڈھا دی گئی ہے۔ان کو اصل ایشو مجھ سے ہے لیکن میرے دوستوں کو پکڑ رہے ہیں۔

ایک دوست کو میں نے فون کیا اس کوبھی اٹھا لیا گیا ہے۔آصف زرداری نے کہا کہ یہ ٹریڈنگ اکاؤنٹ کو جعلی کہتے ہیں۔ایف آئی اے ڈیڑھ کروڑ کا کیس کیوں ڈال رہی ہے۔انہوں نے کہا کہ ریاست کو خطرہ باہر سے نہیں اندر سے ہے۔کوشش کروں گا کہ قوم کوسارے شکنجوں سے بچا سکوں۔انہو ں نے کہا کہ سارا جھگڑا اٹھارویں ترمیم کا ہے ۔ یہ اٹھارویں ترمیم ختم کروانا چاہتے ہیں۔

میں مان بھی جاؤں تو پنجاب ، کے پی نہیں مانے گا۔اٹھارھویں ترمیم کا سب سے زیادہ فائدہ پنجاب کوہوا ہے۔موجودہ حکومت کی سوچ اور انتظامی معاملات کا طریقہ ہے اس سے کام نہیں چلے گا۔انہوں نے کہا کہ مشرف سے بھی این آر او نہیں مانگا تھا، اب میں این آراو کیوں مانگوں ؟ ابھی تومیری اسمبلی کے علاوہ عمران خان سے ملاقات بھی نہیں ہوئی۔میں نے توکیسز ویسے ہی جیتے ہیں۔

انہوں نے کہا کہ میں گرفتار ہوتا رہاہوں اگر آپ صبح اخبار میں پڑھیں کہ میں گرفتار ہوگیا ہوں توکیا کوئی نئی بات ہوگی؟سابق صدر نے کہا کہ میں ڈکٹیٹرمشرف کے دور میں پانچ جیل میں رہا۔ یہ ڈکٹیٹر سسٹم کی ایکٹنگ کرنے والے بیڈ ایکٹنگ کررہے ہیں ، پولیس آجائے توخود بنی گالہ سے نیچے نہیں آسکتے۔ جیسا کریں گے ویسا بھریں گے۔آصف زرداری نے کہا کہ میرے پاس طیارے سے متعلق اس طرح کی کوئی معلومات نہیں ہے۔

لیکن سب کچھ ممکن ہے۔انہوں نے کہا کہ نوازشریف کو نہ میری ضرورت ہے اور نہ مجھے نوازشریف کی ضرورت ہے۔مولانا فضل الرحمن اے پی سی بلانا چاہتے ہیں۔اے پی سی میں جانے کی حامی بھری ہے۔اگر نوازشریف اے پی سی میں آئیں گے توان سے ضرور ملاقات ہوگی۔حکومت گرانے میں کوئی دلچسپی نہیں ہے۔ہم چاہتے ہیں حکومت اپنی مدت پوری کرے، یہ لوگ حکومت کریں اور تھکیں۔ انہوں نے کہا کہ میں نے ڈونکی کنگ فلم دیکھی نہیں لیکن سوچ رہا ہوں کہ ڈونکی کنگ فلم آج دیکھ لوں۔