عمران مافیا نے شریف گروپ کے دفاتر پر چھاپہ تو مار لیا لیکن ہمیشہ کی طرح اسے کچھ نہیں ملا ‘ مریم اورنگزیب

بتایا جائے اب جہانگیر ترین اور خسرو بختیار کے دفاتر اور ملوں پرکب چھاپہ مارا جائے گا‘ مرکزی سیکرٹری اطلاعات (ن) لیگ

اتوار 16 فروری 2020 12:00

عمران مافیا نے شریف گروپ کے دفاتر پر چھاپہ تو مار لیا لیکن ہمیشہ کی ..

لاہور(اُردو پوائنٹ اخبارتازہ ترین - این این آئی۔ 16 فروری2020ء) پاکستان مسلم لیگ (ن) کی مرکزی سیکرٹری اطلاعات مریم اورنگزیب نے کہا ہے کہ عمران مافیا نے شریف گروپ کے دفاتر پر چھاپہ تو مار لیا لیکن ہمیشہ کی طرح اسے کچھ نہیں ملا ،بتایا جائے اب جہانگیر ترین اور خسرو بختیار کے دفاتر اور ملوں پرکب چھاپہ مارا جائے گا ۔ اپنے بیان میں انہوں نے کہا کہ جہانگیر ترین ، خسرو بختیار زمان پارک ، بنی گالہ پرچھاپہ مارے جائیں تو پتہ چل جائے گا عوام کی روٹی ، چینی اور آٹا کہاں ہے،ہزار ارب کا قرضہ کہاں جا رہا ہے اس کابھی پتہ چل جائے گا ۔

انہوں نے کہا کہ جہانگیر ترین ، خسرو بختیار ،زمان پارک ، بنی گالہ پر چھاپہ مارا جائے تو پشاور میٹرو کے 150 ارب اور عمران صاحب کی لینڈ کروزر کہاں سے آئی اس کا بھی پتہ چل جائے گا۔

(جاری ہے)

انہوںنے کہا کہ مسلم لیگ (ن) کو جیلوں میں رکھ کر اٹھارہ ماہ میں ایک روپے کی کرپشن کا ثبوت عدالت میں نہیں پیش کیا جا سکالیکن عمران مافیا جہانگیر ترین ، خسرو بختیار زمان پارک ، بنی گالہ پر چھاپہ مارے توعوام کی لوٹی ہوئی رقم، آٹا ، چینی اور روٹی کا حساب مل جائے گا۔

موجودہ حکومت نے اٹھارہ ماہ میں روزگار ، کاروبار معیشت تباہ کر دی ،اپنی چوری ، نااہلی اور نالائقی سے نظر ہٹانے کے لئے سیاسی مخالفین کے گھروں پہ چھاپے مار ے جارہے ہیں ۔ انہوں نے کہا کہ عمران مافیا نے اٹھارہ ماہ میں 13 ہزار قرضہ اور پشاور میٹرو کے 150 ارب اپنی جیب میں ڈال لئے اور چھاپے سیاسی مخالفین کے دفتروں پر مارے جارہے ہیں،عمران مافیا نے عوام کا آٹا ، چینی اور روٹی چوری کر لی اور چھاپے سیاسی مخالفین کے گھروں پر مارے جارہے ہیں،عمران مافیا پورا کا پورا غیر قانونی فارن فنڈنگ سے بنا اور چھاپے اور جھوٹے مقدمے سیاسی مخالفین پر کرائے جارہے ہیں۔