شہباز شریف کے صاحبزادے حمزہ شہباز کو جیل میں کورونا ہوگیا

کورونا ٹیسٹ مثبت آنے سے ایک دن پہلے انہوں نے اپنے والد سے بھی ملاقات کی

ساجد علی اتوار 13 ستمبر 2020 10:05

شہباز شریف کے صاحبزادے حمزہ شہباز کو جیل میں کورونا ہوگیا

لاہور (اُردو پوائنٹ اخبارتازہ ترین۔ 13 ستمبر2020ء) پنجاب اسمبلی مین اپوزیشن لیڈر حمزہ شہباز شریف کو کورونا ہوگیا ، کورونا ٹیسٹ مثبت آنے سے ایک دن پہلے حمزہ شہباز نے اپنے والد شہبازشریف سے بھی ملاقات کی ۔ تفصیلات کے مطابق قومی اسمبلی میں اپوزیشن لیڈر اور مسلم لیگ ن کے صدر شہبازشریف نے بتایا ہے کہ ان کے بیٹے حمزہ شہبازکو جیل میں کورونا ہوگیا اور وہ سیاسی انتقام کا انتہائی جرات مندی سے سامنا کر رہا ہے ۔

سابق وزیراعلیٰ پنجاب نے کہا کہ حمزہ شہباز مشرف دور کے بعد نیب نیازی گٹھ جوڑ کا سامنا کررہا ہے ۔ مسلم لیگ ن کی ترجمان مریم اورنگزیب نے کہا ہے کہ حمزہ شہباز گزشتہ تین روز سے شدید بخار میں مبتلا ہیں ، بگڑتی ہوئی صحت کو دیکھتے ہوئے انہیں کوٹ لکھپت جیل سے فوری اسپتال منتقل کیا جائے ۔

(جاری ہے)

پاکستان مسلم لیگ(ن) کی ترجمان مریم اورنگزیب کا حمزہ شہباز کو علاج کے لئے فوری ہسپتال منتقل کرنے کا مطالبہ

حمزہ شہباز کا کورونا کا ٹیسٹ مثبت آیا ہے اور وہ گزشتہ تین روز سے شدید بخار میں مبتلا ہیں

بگڑتی ہوئی صحت کو دیکھتے ہوئے انہیں کوٹ لکھپت جیل سے فوری ہسپتال منتقل کیا جائے
— Marriyum Aurangzeb (@Marriyum_A) September 12, 2020

سماجی رابطوں کی ویب سائٹ ٹویٹر پر اپنے ایک پیغام میں انہوں نے لکھا ہے کہ علاج میں سستی یا لاپرواہی سے پنجاب اسمبلی میں قائد حزب اختلاف کی صحت خطرے سے دوچار ہوسکتی ہے۔

مسلم لیگ ن کے رہنما عطا تارڑنے کہا ہے امید ہے کہ حمزہ شہباز شریف کو کوٹ لکھپت جیل سے جلد ہسپتال منتقل کیا جائے گا ۔ یاد رہے کہ نیب نے پنجاب اسمبلی میں اپوزیشن لیڈر اور سابق وزیراعلیٰ پنجاب شہباز شریف کے صاحبزادے حمزہ شہبازشریف کو آمدن سے زائد اثاثہ جات کیس میں گرفتار کیا تھا اور وہ اس وقت جیل میں ہیں ، اس کے ساتھ ساتھ حمزہ شہباز رمضان شوگر ملز کیس میں بھی ملزم نامزد ہیں لیکن اس مقدمے میں انہوں نے لاہور ہائی کورٹ سے ضمانت لی ہوئی ہے۔

واضح رہے کہ اس سے قبل مسلم لیگ ن کے مرکزی صدر شہبازشریف کا کورونا ٹیسٹ بھی مثبت آیا تھا جس پر انہوں نے خود کو قرنطینہ کر لیا تھا جبکہ مسلم لیگ ن کے رہنما احسن اقبال، سابق وزیراعظم شاہد خاقان عباسی، ن لیگ کی ترجمان مریم اورنگزیب اور خواجہ سلمان رفیق کا کورونا ٹیسٹ بھی مثبت آیا تھا ۔