مسلم لیگ ن نے سندھ بھر میں پی پی اُمیدواروں کی حمایت کا اعلان کر دیا

ن لیگ سندھ بھر میں ضمنی الیکشن میں پی پی امیدواروں کی حمایت کرے گی، پیپلز پارٹی اور ن لیگی رہنماؤں کی مشترکہ پریس کانفرنس

Shehryar Abbasi شہریار عباسی بدھ جنوری 23:20

مسلم لیگ ن نے سندھ بھر میں پی پی اُمیدواروں کی حمایت کا اعلان کر دیا
کراچی (اُردو پوائنٹ اخبارتازہ ترین۔ 13 جنوری2021ء) پاکستان مسلم لیگ ن نے سندھ بھر میں ضمنی الیکشن میں پی پی امیدواروں کی حمایت کا اعلان کر دیا ہے۔ میڈیا رپورٹس کے مطابق آج کراچی میں پیپلز پارٹی اور ن لیگی رہنماؤں نے مشترکہ پریس کانفرنس کی جس میں ن لیگ نے سندھ بھر میں ضمنی الیکشن میں پی پی امیدواروں کی حمایت کا اعلان کیا ہے۔ اس حوالے سے پیپلز پارٹی کے رہنماء نثار کھوڑو نے کہا کہ ن لیگ نے پیپلزپارٹی کی مکمل حمایت کا اعلان کیا ہے۔

انہوں نے کہا کہ اس نااہل حکومت نے 2 سال میں عوام کو قلاش کر دیا ہے۔ 5 سال میں کیا ہوگا اس کا تصور بھی نہیں کیا جا سکتا۔ پریس کانفرنس سے گفتگو کرتے ہوئے صدر پاکستان مسلم لیگ ن سندھ محمد زبیر نے کہا کہ پیپلز پارٹی کے امیدوار پی ڈی ایم کے امیدوار تصور کیے جائیں گے۔

(جاری ہے)

ن لیگ ان کی مکمل حمایت کرے گی۔ اس موقع پر سابق گورنر سندھ محمد زبیر نے کہا کہ ملک میں مہنگائی، بےروزگاری اور غربت نے عوام کا بیڑا غرق کر دیا ہے۔

رہنما ن لیگ شاہ محمد شاہ نے کہا کہ ہم ہر جگہ پیپلز پارٹی کے ساتھ کھڑے رہیں گے، ووٹ بھی دیں گے اور پولنگ اسٹیشنز بھی سنبھالیں گے۔ واضح رہے کہ ضمنی انتخابات کے بعد پی ڈی ایم نے سینٹ کا میدان بھی خالی نہ چھوڑنے کا فیصلہ کرلیا ہے، پی ڈی ایم سینٹ کے انتخابات کے بعد اسمبلیوں سے مستعفی ہو گی ۔ دوسری جانب پیپلز پارٹی نے سندھ سےسینیٹ میں نئے لوگوں کو بھی لانے کا سوچ رہی ہے جس حوالے سے کئی نام زیر غور ہیں۔

بتایا گیا ہے کہ ریٹائر ہونے کے بعد سسی پلیجو کو سندھ کابینہ میں شامل کرنے پر غور ہو رہا ہے، جبکہ ذرائع نے کہا ہے کہ سلیم مانڈوی والا کو کابینہ میں بھی اہم ذمہ داری دینے پر غور کیا جا رہا ہے۔دوسری جانب ضمنی انتخابات میں پیپلز پارٹی نے سندھ میں قومی و صوبائی اسمبلی کی 3 نشستوں پر الیکشن لڑنے کا فیصلہ کیا ہے۔ جبکہ مسلم لیگ ن اور جے یو آئی سانگھڑ اور ملیر میں پیپلز پارٹی کے امیدوار کی حمایت پر غور کر رہے ہیں۔