حلفیہ کہتا ہوں ایم کیو ایم پاکستان نے تحریک انصاف کو ووٹ نہیں دیا

ہم نے حکومت کو سینیٹ نشست نہیں لینے دی، اب حکومت کا چئیرمین سینیٹ بھی نہیں بننے دیں گے: پیپلزپارٹی کے سینئر رہنما نبیل گبول کا دعویٰ

محمد علی بدھ 3 مارچ 2021 23:10

اسلام آباد (اُردو پوائنٹ اخبارتازہ ترین۔ 03 مارچ2021ء) سینئر پی پی رہنما کے مطابق حلفیہ کہتا ہوں ایم کیو ایم پاکستان نے تحریک انصاف کو ووٹ نہیں دیا۔ تفصیلات کے مطابق پیپلز پارٹی کے رکن قومی اسمبلی نبیل گبول کی جانب سے نجی ٹی وی چینل کے پروگرام سے گفتگو کرتے ہوئے بڑا دعویٰ کیا گیا ہے۔ نبیل گبول کے تحریک انصاف کو ایم کیو ایم پاکستان کے ووٹ نہیں ملے، اسی لیے قومی اسمبلی میں ہوئی ووٹنگ کے دوران حفیظ شیخ کو شکست ہوئی۔

نبیل گبول کے مطابق ہم نے حکومت کو سینیٹ نشست نہیں لینے دی، اب حکومت کا چئیرمین سینیٹ بھی نہیں بننے دیں گے۔ واضح رہے کہ سینیٹ کی کل 48 نشستوں کے الیکشن کے سلسلے میں صوبائی اسمبلیوں اور قومی اسمبلی میں ہونے والی ووٹنگ کے غیر سرکاری غیر حتمی نتائج سامنے آ چکے۔

(جاری ہے)

اب تک موصول ہونے والے مجموعی غیر سرکاری غیر حتمی نتائج کے مطابق حکمراں جماعت تحریک انصاف کو برتری حاصل ہے۔

تحریک انصاف نے 18 نئی نشستیں حاصل کر کے کل 28 نشستیں حاصل کر لیں۔ پیپلز پارٹی نے 8 نئی اور کل 21 ، مسلم لیگ ن نے 5 نئی اور کل 18 نشستیں حاصل کی ہیں۔ جبکہ بی اے پی کو 6 نئی اور کل 12 نشستیں ملی ہیں۔ اس کے علاوہ ایم کیو ایم پاکستان کو بھی کل 3 نشستیں مل چکیں، مسلم لیگ ق نے ایک نشست حاصل کی ہے۔ آزاد امیدوار بھی اب تک 6 نشستیں حاصل کر چکے۔ تاہم تحریک انصاف سینیٹ کی سب سے بڑی جماعت بننے کے باوجود ایوان میں اکثریت حاصل کرنے میں ناکام رہی۔

تحریک انصاف اور اس کی اتحادی جماعتوں کی سینیٹ میں اپوزیشن کی کل نشستوں سے 6 نشستیں کم ہیں۔ یاد رہے کہ آج سینیٹ کی 37 نشستوں پر الیکشن ہوا جس کے لیے پولنگ کا عمل صبح 9 بجے شروع ہوا، پولنگ کا عمل 5 بجے تک جاری رہا۔ سینیٹ انتخابات کے لیے قومی اور تین صوبائی اسمبلیوں میں پولنگ ہوئی۔ پولنگ کا عمل بغیر کسی وقفے کے جاری رہا۔ پنجاب کی 12 نشستوں پر پہلے ہی بلامقابلہ انتخاب مکمل ہو شکا تھا اس لیے آج پنجاب اسمبلی میں ووٹنگ نہیں ہوئی۔

قومی اسمبلی کے 341 اراکین میں سے 340 نے اپنا ووٹ کاسٹ کیا جب کہ جماعت اسلامی کے رکن قومی اسمبلی مولانا عبدلااکبر چترالی نے ووٹ کاسٹ نہیں کیا۔این اے 75 ڈسکہ سے کوئی ممبر قومی اسمبلی میں نہیں ہے کیونکہ یہاں پر الیکشن کمیشن نے دوبارہ انتخابات کااعلان کر رکھا ہے۔ اسلام آباد کی 2، سندھ کی 11، خیبرپختونخوا کی 12 اور بلوچستان کی 12 نشستوں پر پولنگ ہوئی۔ صوبوں کی نشستوں پر ارکان صوبائی اسمبلی نے ووٹ ڈالا۔ جبکہ اسلام آباد کی 2 نشستوں پر ارکان قومی اسمبلی نے ووٹ کاسٹ کیا۔ اسلام آباد کی جنرل نشست پر پی ٹی آئی کے ڈاکٹر عبدالحفیظ شیخ اور پاکستان ڈیموکریٹک موومنٹ کے یوسف رضا گیلانی کے درمیان کانٹے کا مقابلہ ہوا۔