وزیراعظم عمران خان اور خاتون اوّل نے عمرے کی سعادت حاصل کرلی

وزیراعظم کیلئے خصوصی طور پر خانہ کعبہ کے دروازے کھولے گئے، عمران خان اور خاتون اوّل نے کعبہ کےاندر نوافل ادا کیے، معاون خصوصی شہباز گل کا ٹویٹ

دانش احمد انصاری اتوار 9 مئی 2021 19:27

مکہ (اُردو پوائنٹ، اخبار تازہ ترین، 9مئی 2021) وزیراعظم عمران خان اور خاتون اوّل نے عمرے کی سعادت حاصل کرلی، وزیراعظم کیلئے خصوصی طور پر خانہ کعبہ کے دروازے کھولے گئے، عمران خان اور خاتون اوّل نے کعبہ کےاندر نوافل ادا کیے۔ تفصیلات کے مطابق وزیراعظم عمران خان اور خاتون اول بشریٰ بی بی نے عمرے کی سعادت حاصل کرلی۔معاون خصوصی برائے سیاسی روابط شہباز گل نے سماجی رابطے کی ویب سائٹ ٹویٹر پر بتایا کہ وزیراعظم عمران خان اور خاتون اول نے عمرے کی سعادت حاصل کرلی۔

وزیراعظم عمران خان اور خاتون اوّل بشری عمران نے عمرہ کی سعادت مکمل کی۔ وزیراعظم اور ان کے وفد کے لئیے خانہ کعبہ کا دروازہ خصوصی طور پر کھولا گیا۔ وزیراعظم اور خاتون اوّل اور وفد نے خانہ کعبہ کے اندر نوافل ادا کئیے۔
— Dr. Shahbaz GiLL (@SHABAZGIL) May 9, 2021

شہباز گل نے لکھا کہ وزیراعظم اور وفد کے لیے خانہ کعبہ کا دروازہ خصوصی طور پر کھولا گیا، وزیراعظم، خاتون اول اور وفد نے خانہ کعبہ کے اندر نوافل ادا کیے۔اس سے قبل وزیرِاعظم عمران خان نے گزشتہ روز اپنے وفد کے ہمراہ روضہ رسول صلی اللّہ علیہ والہ وسلم پر حاضری دی تھی، انہوں نے پاکستان کی ترقی و خوشحالی، امت مسلمہ کی یکجہتی، کورونا وبا سے نجات کے لئے خصوصی دعا کی۔

(جاری ہے)

وزیرِاعظم نے وفد سمیت مسجدِ نبوی (صلی اللہ علیہ وآلہ وسلم) میں افطار بھی کیا اور نمازِ مغرب اور عشا ادا کی تھی۔اس موقع پر وزیرِ خارجہ شاہ محمود قریشی، وزیرِ داخلہ شیخ رشید احمد، گورنر سندھ عمران اسماعیل، گورنر خیبر پختونخوا شاہ فرمان، سینیٹر فیصل جاوید خان اور صوبائی وزیر علیم خان ، معاونِ خصوصی برائے سیاسی مواصلات ڈاکٹر شہباز گل اور وزیرِ اعظم کے نمائندہ خصوصی برائے مذہبی ہم آہنگی مولانا طاہر اشرفی بھی وزیراعظم کے ہمراہ تھے۔

خیال رہے کہ وزیراعظم عمران خان، سعودی ولی عہد شہزادہ محمد بن سلمان کی دعوت پر تین روزہ دورے پر ہیں۔سعودی عرب کے تین روزہ دورے پر موجود پاکستان کے وزیراعظم عمران خان نے روضہ رسولﷺ پر حاضری دی تو وزیراعظم کے معاون خصوصی شہباز گل نے سماجی رابطوں کی ویب سائٹ ٹوئٹر سے عمران خان کی روزہ رسول ﷺ کے پاس بیٹھے تصویر شیئر کی ،

PM and First Lady in Makkah pic.twitter.com/TwNokmjTms
— Dr. Shahbaz GiLL (@SHABAZGIL) May 9, 2021

انہوں نے لکھا کہ وزیراعظم عمران خان اپنے اور آپ سب کے محبوب محمد ﷺ کے روضہ پر حاضری اور افطار کی برکتیں سمیٹتے ہوئے۔

اس حوالے سے وفاقی وزیر اطلاعات ونشریات فواد چوہدری نے کہا کہ سرکارِ دوعالم محمد مصطفیﷺ کے دربار میں غلام کی حاضری ، ادب کا قرینہ کہ جوتے پہننے کی جسارت دربارِمصطفیﷺ میں تو کیا ان کے شہر میں بھی نہیں ، کیوں کہ ادب پہلا قرینہ ہے محبت کے قرینوں میں۔