پاکستان کا بھارت کے اندر جوہری مواد کی ممکنہ بلیک مارکیٹ پر اظہارتشویش

6 کلو گرام یورینیم کی غیرقانونی فروخت کی رپورٹ دیکھی، گزشتہ ماہ بھی مہاراشٹر میں7 کلو گرام یورینیم کی فروخت کی کوشش ہوئی، جوہری مواد کی سیکیورٹی کو مضبوط بنانے سمیت واقعات کی تحقیقات کی جائیں۔ ترجمان دفتر خارجہ

ثنااللہ ناگرہ جمعہ 4 جون 2021 18:40

پاکستان کا بھارت کے اندر جوہری مواد کی ممکنہ بلیک مارکیٹ پر اظہارتشویش

اسلام آباد (اردوپوائنٹ اخبارتازہ ترین۔ 04 جون2021ء) بھارت کے اندر جوہری مواد کی ممکنہ بلیک مارکیٹ کا انکشاف ہوا ہے، ترجمان دفتر خارجہ نے کہا کہ 6 کلوگرام یورینیم کی غیرقانونی فروخت کی رپورٹ دیکھی، گزشتہ ماہ مہاراشٹر میں 7 کلوگرام یورینیم کی فروخت کی کوشش کی گئی، جوہری مواد کی سیکیورٹی کو مضبوط بنانے سمیت واقعات کی مکمل تحقیقات کی جائیں۔

تفصیلات کے مطابق ترجمان دفتر خارجہ نے اپنے بیان میں کہا کہ بھارت میں 6 کلو گرام یورینیم کی غیرقانونی فروخت کے ایک اور واقعہ کی رپورٹ دیکھی، اس سے قبل مہاراشٹر میں گزشتہ ماہ 7 کلوگرام یورینیم کی فروخت کی کوشش کی گئی۔ اس طرح کے واقعات اور رپورٹس سخت تشویش کا باعث ہیں۔ پاکستان کو بھارت کے اندر جوہری مواد کی ممکنہ بلیک مارکیٹ پرسخت تشویش ہے۔

(جاری ہے)

دفتر خارجہ نے کہا کہ پاکستان ان واقعات کی مکمل تحقیقات پر زور دیتا ہے۔ اس بات کا سراغ لگانا بھی ضروری ہے کہ یورینیم کی فروخت کی کوشش کے مقاصد کیا تھے۔ اسی طرح جوہری مواد کی سیکیورٹی کو مضبوط بنانے کیلئے اقدامات کیے جائیں۔ اس کے ساتھ ساتھ بھارت کی جانب سے مذموم مقاصد کو حاصل کرنے کیلئے جھوٹا پروپیگنڈا پھیلانے کا نیٹ ورک بھی پکڑا گیا ہے، 28 مئی کی ایک رپورٹ کے مطابق بھارت میں انتہاء پسند مودی سرکار کا جھوٹ پھیلانے کا ایک اور نیٹ ورک پکڑا گیا، مودی سرکار نے کینیڈین کمپنی کے ذریعے جعلی خبریں ڈھونڈنے کیلئے فیکٹ چیک ویب سائٹ بنائی۔

ویب سائٹ سے جعلی خبروں کے ذریعے عالمی رائےعامہ کو بھارت کے حق میں کیا جاتا تھا۔ اس مقصد کیلئے 5 سے زائد بھارتی سفارتکار اپنے سوشل میڈیا اکاؤنٹس سے ان خبروں کو شیئر کرتے رہے۔ ویب سائٹ کے ذریعے مودی سرکار کے مخالفین کو برا بھلا بھی کہا جاتا تھا۔ جعلی خبروں کو ڈھونڈنے والی امریکی کمپنی ڈی آر ایف لیب نے بھانڈا پھوڑ دیا۔ بتایا گیا ہے کہ جعلی خبریں پھیلانے والی اس ویب سائٹ کے ساتھ بھارتی حکومت کے کئی معاہدے بھی ہیں۔