Live Updates

بجٹ کے بعد بھی مہنگائی کا طوفان تھم نہ سکا، ملک میں مہنگائی کی شرح 15 فیصد سے تجاوز کر گئی

چینی ، دالیں، ککنگ آئل، سبزیاں ،دودھ اور آٹے سمیت ضروریاتِ زندگی کی کل 21 اشیا کی قیمتوں میں اضافہ ہو گیا، ادارہ شماریات

دانش احمد انصاری اتوار 27 جون 2021 21:29

اسلام آباد (اُردو پوائنٹ ، اخبار تازہ ترین، 27جون 2021) بجٹ کے بعد بھی مہنگائی کا طوفان تھم نہ سکا، ملک میں مہنگائی کی شرح 15 فیصد سے تجاوز کر گئی، چینی ، دالیں، ککنگ آئل، سبزیاں ،دودھ اور آٹے سمیت ضروریاتِ زندگی کی کل 21 اشیا کی قیمتوں میں اضافہ ہو گیا۔ تفصیلات کے مطابق سالانہ بنیادوں پر مہنگائی کی شرح بڑھ کر 15.29 فیصد ہو گئی ہے۔گذشتہ ایک ہفتے کے دوران آلو، ٹماٹر، آٹا، انڈے، لہسن، پیاز، تازہ دودھ، مٹن، بیف، ویجی ٹیبل گھی، ایل پی جی، باسمتی ٹوٹا چاول، صابن، سرسوں کا تیل ،چائے کی پتی ،آٹا اور چکن سمیت مجموعی طور پر21 اشیائے ضروریہ کی قیمتوں میں اضافہ ہوا، چینی، دال مونگ، دال چنا، دال ماش اور دال مسور سمیت7 اشیا سستی ہوئیں،23 اشیائے ضروریہ کی قیمتیں مستحکم رہیں۔

ادارہ شماریات کے مطابق کہ ہفتہ وا بنیادوں پر گذشتہ ہفتے کے دوران ٹماٹر14.56فیصدایل پی جی 8.64فیصد، چکن11.43فیصد،پیاز8.38 فیصد، آلو1.21فیصد, لہسن 6.97فیصد اورگھی5.36 فیصد، ککنگ آئل1.31فیصد مہگا ہوا جبکہ دال مونگ3.79فیصد،دال مسور 0.26فیصد، دال چنا0.71فیصد ،دال ماش 0.45فیصد اور چینی0.12 فیصد سستی ہوئی۔

(جاری ہے)

وفاقی ادارہ برائے شماریات کی جانب سے جاری کردہ اعدادوشمار میں بتایا گیا ہے کہ24جون کو ختم ہونیوالے ہفتے کے دوران حساس قیمتوں کے اعشاریہ(ایس پی آئی) کے لحاظ سے گذشتہ سال کے اسی عرصہ کے مقابلہ میں ملک میں مہنگائی کی شرح15.29فیصد رہی تاہم اس سے پچھلے ہفتے کے مقابلہ میں پیوستہ ہفتے کے دوران مہنگائی کی شرح0.82فیصد اضافہ ہوا۔

دوسری جانب فاقی وزیر اطلاعات فواد چوہدری نے اپنے ایک بیان میں کہا ہے کہ عمران خان نے انتخابات سے قبل جتنے وعدے کئے 3سال میں پورے کردئیے، ہم نےبے روزگاری ختم کی، مہنگائی میں کمی کی، تاریخی منصوبے شروع کئے ،پولیس اور پٹوری کی سیاست کا مکمل خاتمہ کیااور 100 سال سے لٹکا نہری منصوبہ شروع کردیا، اب تنقید کا کوئی جواز نہیں۔