Live Updates

راولپنڈی میں کیش گروپ ہار گیا اور عمران خان جیت گیا ہے، شیخ رشید

عمران خان کشمیر میں حکومت بنانے جارہے ہیں ، سندھ میں بھی جلد تحریک انصاف کی حکومت ہوگی، وزیر داخلہ

اتوار 25 جولائی 2021 23:15

راولپنڈی میں کیش گروپ ہار گیا اور عمران خان جیت گیا ہے، شیخ رشید
راولپنڈی (اُردو پوائنٹ اخبارتازہ ترین - این این آئی۔ 25 جولائی2021ء) وفاقی وزیر داخلہ شیخ رشید احمد نے کہا ہے کہ راولپنڈی میں کیش گروپ ہار گیا اور عمران خان جیت گیا ہے، عمران خان کشمیر میں حکومت بنانے جارہے ہیں ، سندھ میں بھی جلد تحریک انصاف کی حکومت ہوگی ۔راولپنڈی میں اپنی رہائش گاہ لال حویلی کے باہر پاکستان تحریک انصاف (پی ٹی آئی) کے کارکنوں سے خطاب کرتے ہوئے وفاقی وزیر داخلہ شیخ رشید احمد نے کہا کہ عمران خان پاکستان میں دنیا کے سب سے اہم کام کرنے جا رہے ہیں، وہ داسو اور بھاشا ڈیم ہیں۔

انہوں نے کہا کہ یہ ڈیم 5 نہیں 10 ہزار میگاواٹ بجلی کا اضافہ کریں گے اور پاکستان کی تاریخ بدل دے گا۔شیخ رشید نے کہا کہ ہمارے تین سال پورے ہورہے ہیں اور دو سال رہتے ہیں اور ہمیں ایک سال خدمت کرنی ہے، میں آپ سے وعدہ کرتا ہوں کہ کراچی سے جعلی شناختی کارڈ بنانے والے 19 لوگ نکالے ہیں، جو افغان جعلی کارڈ بناتے تھے، اسی طرح پنڈی، لاہور اور پشاور سے بھی نکالوں گا۔

(جاری ہے)

انہوںنے کہاکہ پنڈی کے لوگوں، میں آپ کو یقین دلاتا ہوں، ہم شرافت اور احترام کی سیاست کرتے ہیں اور پنڈی شہر نے ثابت کردیا ہے کہ وہ عمران خان کے ساتھ ہے۔انہوں نے کہا کہ ویلی کی نشستوں پر جو کچھ پیسے خرچ ہوئے اس کا ذکر نہیں کرنا چاہتا، میں اس لیے ذکر نہیں کرنا چاہتا کہ جمہوریت کی توہین ہے لیکن ان نشستوں پر ایسا ہی ہوا ہے۔وزیر داخلہ نے کہا کہ عمران خان پاکستان میں مشین کے الیکشن کی بات اسی لیے کرتا ہے تاکہ کسی کو شک نہ ہو اور میں سارے کشمیریوں کو کہتا ہوں کہ عمران خان، کشمیر کی آزادی کا کیس لڑے گا اور ساری دنیا میں ڈنکا بجائے گا۔

انہوں نے کہا کہ کشمیر کے انتخابات میں پی ٹی آئی راولپنڈی میں پہلی مرتبہ جیتی ہے، اس سے پہلے کبھی نہیں جیتی تھی اور ایک غریب آدمی کے ساتھ جیتی ہے۔وزیرداخلہ نے کہا کہ ابھی تو میں راولپنڈی کو مبارک باد دیتا ہوں کہ کیش گروپ ہار گیا ہے اور عمران خان جیت گیا ہے۔انہوںنے کہاکہ کیش گروپ ہار گیا ہے، جنہوں نے لوگوں کے ضمیر خریدے، پیسوں سے لوگوں کے ووٹ خریدے اور شناختی کارڈ رکھے، ہم اس شہر کو بہتری کی طرف لے کر جائیں گے۔

انہوں نے کہا کہ کابل اور لندن میں میرے خلاف مظاہرے ہو رہے ہیں، بیٹیاں سانجھی ہوتی ہیں تاہم پاکستان پر نام آرہا تھا کہ ہمارے ہاں امن وامان نہیں ہے، یہ اسلام آباد ہے جہاں 4 ٹیکسیاں بدلی ہیں تو پھر بھی ہم پہنچے ہیں۔انہوںنے کہاکہ ایک بچی جو قتل ہوئی ہے، ان کے قاتلوں کو نہیں چھوڑیں گے، اور میں اعلان کرتا ہوں کہ وزارت داخلہ سارے پاکستان میں منشیات کے خلاف جہاد کرے گی، سارے پاکستان میں جتنی منشیات ہیں، اس کے خلاف وزارت داخلہ جہاد کرے گی۔

وفاقی وزیر داخلہ نے کہا کہ میں عمران خان، پی ٹی آئی اور رکشہ ڈرائیور کو مبارک باد پیش کرتا ہوں کہ عمران خان راولپنڈی میں جیت گیا ہے۔شیخ رشید نے کہا کہ گزشتہ روز میں نے لاہور میں کہا تھا لیکن لوگوں کا خیال تھا کہ میں ویسے ہی پیشن گوئیاں کرتا ہوں، میں اندر سے آدھا ولی ہوں، یہ لال حویلی کے جنات اللہ کے بعد میرے ساتھ کھڑے ہوتے ہیں۔
Live کابل میں طالبان کا کنٹرول سے متعلق تازہ ترین معلومات