ملک بھر میں کورونا سے اموات کا سلسلہ جاری ، مزید 53 افراد لقمہ اجل بن گئے

گزشتہ 24 گھنٹوں کے دوران کورونا مثبت کیسز کی شرح 7.54 فیصد رہی

سمیرا فقیرحسین پیر 9 اگست 2021 10:30

ملک بھر میں کورونا سے اموات کا سلسلہ جاری ، مزید 53 افراد لقمہ اجل بن ..

اسلام آباد (اُردو پوائنٹ تازہ ترین اخبار۔ 09 اگست 2021ء) : ملک بھر میں کورونا کی چوتھی لہر جاری ہے، گذشتہ چوبیس گھنٹوں کے دوران کورونا سے مزید 53 افراد جاں بحق ہو گئے ۔ جس کے بعد مجموعی اموات کی تعداد 23ہزار 918ہو گئی، کورونا مثبت کیسزکی شرح 7 اعشاریہ پانچ چار ریکارڈ کی گئی۔ جبکہ کورونا وائرس کے چار ہزار چالیس نئے کیسز سامنے آئے جس کے بعد ملک بھر میں کورونا وائرس کے ایکٹو کیسز کی تعداد 83 ہزار 298 تک پہنچ گئی۔

نیشنل کمانڈ اینڈ آپریشن سینٹر (این سی او سی) کی جانب سے جاری اعدادو شمار کے مطابق گزشتہ 24 گھنٹوں کے دوران 4 ہزار 40 کورونا کیسز رپورٹ ہوئے۔ ملک بھر میں کورونا کے مجموعی کیسز کی تعداد 10 لاکھ 71 ہزار 620 ہو گئی۔ این سی او سی کے مطابق پاکستان میں ایکٹو کیسز کی تعداد 83ہزار 298ہے ،مجموعی کیسز کی تعداد 10لاکھ 71ہزار 620ہو گئی۔

(جاری ہے)

4ہزار 40نئے مریض سامنے آئے ، جبکہ 9لاکھ 64ہزار 404افراد کورونا سے صحت یاب ہوئے۔

کورونا کے سبب سب سے زیادہ اموات پنجاب میں ہوئی ہیں جہاں 11 ہزار 201 افراد جان کی بازی ہار چکے ہیں جبکہ سندھ میں 6 ہزار 215، خیبرپختونخوا 4 ہزار 556، اسلام آباد 816، گلگت بلتستان 153، بلوچستان میں 331 اور آزاد کشمیر میں 646 افراد جان کی بازی ہار چکے ہیں۔ دوسری جانب ملک بھر میں ویکسی نیشن کا عمل بھی جاری ہے۔ خیال رہے کہ کورونا کے بڑھتے کیسز کے پیش نظر لاہور سمیت پنجاب کے مختلف اضلاع میں اسمارٹ لاک ڈاؤن نافذ کردیا گیا۔

این اسی او سی کی سفارشات پر لاک ڈاؤن لگایا گیا لاک ڈاؤن 31 اگست تک نافذ العمل رہے گا۔ لیکن افسوس کہ اسمارٹ لاک ڈاؤن کے باوجود شہری ایس او پیز پر عمل درآمد کرتے دکھائی نہیں دیتے، شہریوں کی انتہائی کم تعداد ماسک پہن رہی ہے، ضلعی انتظامیہ کی جانب سے ایس او پیز کی خلاف ورزی کرنے والوں کے خلاف کارروائیاں بھی جاری ہیں۔