بھارتی انتہا پسندی عروج پر،تاریخی مسجد کو شہید کر دیا گیا

پاکستان نے ہندوؤں کی اس ناپاک حرکت پر شدید ردعمل دیا،دفتر خارجہ

سجاد قادر بدھ 25 اگست 2021 07:55

بھارتی انتہا پسندی عروج پر،تاریخی مسجد کو شہید کر دیا گیا

اسلام آباد (اردو پوائنٹ تازہ ترین اخبار ۔ 25 اگست 2021ء ) پاکستان نے ہریانہ میں تاریخی مسجد کی شہادت کی شدید الفاظ میں مذمت کرتے ہوئے عالمی برادری سے اپیل کی ہے کہ انسانی حقوق کی سنگین خلاف ورزیوں پر بھارت کو کٹہرے میں لایاجائے۔تفصیلات کے مطابق ترجمان دفتر خارجہ عاصم افتخار احمد نے اپنے بیان میں کہا کہ ہریانہ میں بی جے پی حکومت کے دور حکومت میں ایک اور تاریخی مسجدکی شہادت کی مذمت کرتے ہیں بی جے پی،آرایس ایس حکومت قابل مذمت اقدامات میں ملوث ہے، بھارتی حکام عدلیہ کی ملی بھگت سے قابل مذمت اقدامات کررہے ہیں،ہندتواکے زیراثر بھارتی حکومت مسلسل مسلمانوں کونشانہ بنارہی ہے۔

ترجمان دفترخارجہ نے کہا کہ بھارت میں مسلمانوں اور ان کے مذہبی مقامات کو نشانہ بنایا جارہا ہے، جس کے نتیجے میں نام نہاد اور سب سے بڑی جمہوریت کے ماتھے پر نہ مٹنے والا داغ لگ چکا ہے،مسلمانوں،عبادت گاہوں،ثقافتی یادگاروں کوکشمیرمیں بھی نشانہ بنایاجارہاہے۔

(جاری ہے)

دفتر خارجہ کے ترجمان عاصم افتخار نے کہا کہ بھارتی سپریم کورٹ نے نومبردو ہزار انیس میں متنازع فیصلہ دیا، انتہاپسندوں کوتاریخی بابری مسجد کی جگہ مندر بنانے کی اجازت دی گئی، انتہاپسندجنونیوں نے انیس سو بانوے میں تاریخی بابری مسجدکوشہیدکیاتھا، سرعام مسجدشہیدکرنیوالے مجرموں کوعدلیہ کی ملی بھگت سے بری کیاگیا۔

ترجمان دفترخارجہ نے اپنے بیان میں کہا کہ مسلمانوں کوعبادت گاہوں میں شہیدکرنے کے واقعات بھی ہوچکے،دو ہزار دو میں گجرات، فروری دو ہزار بیس میں دہلی میں مسلمانوں کاقتل عام ہوا، ان جرائم کاارتکاب کرنیوالوں کیخلاف کوئی عدالتی کارروائی نہیں کی گئی۔عاصم افتخار نے کہا کہ پاکستان عالمی برادری،اقوام متحدہ،اوآئی سی،انسانی حقوق کی تنظیموں سے مطالبہ کرتا ہے کہ انسانی حقوق کی سنگین خلاف ورزیوں پربھارت کوکٹہرے میں لایاجائے، بھارت تمام اقلیتوں بشمول مسلمانوں کی حفاظت جویقینی بنائے، بھارت ان کے مذہبی وثقافتی مقامات کاتحفظ بھی یقینی بنائے۔