Live Updates

وزیر اعظم کی زیر صدارت راوی اربن ڈویلپمنٹ اتھارٹی اور سنٹرل بزنس ڈسٹرکٹ والٹن سے متعلق جائزہ اجلاس

عمران خان نے ملک میں سمارٹ ، خود کفیل، صاف ستھرے اور سبز مکانات اور کاروباری منصوبوں کے فروغ کیلئے RUDA اور CBD کی اہمیت پر زور دیا

جمعرات 30 ستمبر 2021 23:45

اسلام آباد (اُردو پوائنٹ اخبارتازہ ترین - این این آئی۔ 30 ستمبر2021ء) وزیر اعظم عمران خان نے راوی اربن ڈویلپمنٹ اتھارٹی (RUDA) اور سنٹرل بزنس ڈسٹرکٹ (CBD) ، والٹن سے متعلق جائزہ اجلاس کی صدارت کی۔روڈا کے مختلف منصوبوں میں شمسی توانائی سے چلنے والا قابل تجدید بجلی پیدا کرنے والے پلانٹ کی تنصیب ، خصوصی اقتصادی زونز (SEZs) اور خصوصی ٹیکنالوجی زونز (STZs) کا قیام ، فیری آپریشنز کا آغاز ، نالج پارک اور رکھ جھک فارمز کا قیام شامل ہیں۔

یہ تمام منصوبے اپنی مالی ضروریات کے حوالے سے خود مختار ہوں گے، تاکہ ان کی پائیداری کو یقینی بنایا جا سکے۔وزیراعظم کو آئی ایم جی دبئی تھیم پارک کے اشتراک سے پاکستان کا سب سے بڑا تھیم پارک بنانے کے منصوبے پر بھی بریفنگ دی گئی۔ راوی ریور فرنٹ پر 2000 کنال اراضی پر بنایا جانے والایہ منصوبہ RUDA سرمایہ کاروں کو راغب کرنے کے لیے آئندہ ماہ شروع ہونے والی دبئی ایکسپو 2020 میں نمائش کے لیے پیش کرے گا۔

(جاری ہے)

وزیراعظم نے ملک میں سمارٹ ، خود کفیل، صاف ستھرے اور سبز مکانات اور کاروباری منصوبوں کے فروغ کے لیے RUDA اور CBD کی اہمیت پر زور دیا۔وزیراعظم نے متعلقہ حکام کو ہدایت کی کہ وہ ایک فعال حکمت عملی اپناتے ہوئے مسائل کو حل کریں تاکہ پاکستان براہ راست غیر ملکی سرمایہ کاری (FDI) کو راغب کرکے ان جدید اور پائیدار رئیل اسٹیٹ منصوبوں سے زیادہ سے زیادہ فوائد حاصل کر سکے۔