وزیراعظم عمران خان کے جلد دورہ سعودی عرب کا امکان

اسلام آباد (اردوپوائنٹ اخبارتازہ ترین۔09 اکتوبر2021ء) وزیراعظم عمران خان کے جلد دورہ سعودی عرب کا امکان ہے، سعودی سفیر نے وزیر اعظم کو ولی عہد کی جانب سے دورے کی دعوت دی، وزیراعظم کی مڈل ایسٹ گرین انشیٹیو کانفرنس میں شرکت کا امکان ہے۔ تفصیلات کے مطابق سعودی سفیر نے وزیر اعظم کو ولی عہد کی جانب سے دورے کی دعوت دی، وزیراعظم عمران خان مڈل ایسٹ گرین انشیٹیوکانفرنس میں شرکت کریں گے، مڈل ایسٹ گرین انشیٹیو کانفرنس کا نعقاد 23 سے 25 اکتوبر تک ہوگا، پاکستان اور سعودی عرب موسمیاتی تبدیلیوں پرمنصوبہ بندیوں کے ہم خیال ہیں۔

خیال رہے وزیراعظم عمران نے اقتدار سنبھالنے سے لے کر اب تک سب سے زیادہ سعودی عرب کے دورے کیے ہیں۔ وزیراعظم عمران خان نے رواں سال مئی میں بھی سعودی ولی عہد محمد سلمان کی دعوت پر تین روز کیلئے سعودی عرب کا دورہ کیا، وزیراعظم عمران خان نے دورے کے دوران محمد بن سلمان سے ملاقات کی اور معیشت، توانائی، تجارت، سرمایہ کاری پر بات چیت کی گئی۔

(جاری ہے)

وزیراعظم عمران خان نے اسلامی تعاون تنظیم کے سیکرٹری جنرل ڈاکٹر یوسف العثیمین سے بھی ملاقات کی، جس میں اسلامو فوبیا اور دیگر عالم اسلام کے مسائل کے پر بات کی گئی۔ اسی طرح 16 اگست کو پاکستان میں وزیراعظم عمران خان سے سعودی عرب کی مسلح افواج کے چیف آف جنرل سٹاف جنرل فیاض بن حمید الرویلی نے ملاقات کی ،وزیراعظم عمران خان نے وفد کا خیرمقدم کیا، وزیراعظم نے دونوں ملکوں کے درمیان باہمی تعاون کو مزید وسعت دینے اور سعودی عرب اور پاکستان کے عوام کے مابین روابط کو مضبوط بنانے کی ضرورت پر زور دیا۔

انہوں نے توقع ظاہر کی کہ حال ہی میں قائم ہونے والی سعودی پاکستان سپریم کوآرڈینیشن کونسل تمام شعبوں میں دوطرفہ تعاون کو مزید بڑھانے میں اہم کردار ادا کرے گی۔ یاد رہے پاکستان اور سعودی عرب کے درمیان برادرانہ اور انتہائی قریبی تعلقات قائم ہیں، حکومت پاکستان اور سعودی عرب کے درمیان مؤخر ادائیگی پر تیل کے معاملات طے پاگئے، وزیرخزانہ شوکت ترین نے کہا کہ سعودی عرب پاکستان کو ماہانہ 15 کروڑ ڈالر کی سہولت دے گا، سعودی عرب دو سال میں پاکستان کو 3 ارب 60 کروڑ ڈالر فراہم کرے گا، یہ رقم تیل کی خریداری کیلئے استعمال کی جائے گی۔