وزیراعظم نے کالعدم دہشتگرد تنظیم سے مذاکرات کا تذکرہ کیا تھا، فواد چودھری

اسلام آباد (اُردوپوائنٹ اخبار تازہ ترین۔ 08 نومبر2021ء) وفاقی وزیر اطلاعات ونشریات فواد چودھری نے کہا ہے کہ وزیراعظم نے کالعدم دہشتگرد تنظیم سے مذاکرات کا تذکرہ کیا تھا، مذاکرات آئین پاکستان کے تحت ہورہے ہیں،ریاست کی حاکمیت، عوامی حقوق اور معاشی استحکام کو ملحوظ خاطر رکھا جائے گا، مذاکرات میں پیشرفت کے مطابق فائربندی معاہدے میں توسیع ہوتی جائے گی۔

انہوں نے اہم نیوز کانفرنس میں کہا کہ وزیراعظم عمران خان نے کالعدم دہشتگرد تنظیم سے مذاکرات کا تذکرہ کیا تھا،کالعدم دہشتگرد تنظیم سے آئین پاکستان کے تحت مذاکرات ہورہے ہیں، کوئی بھی حکومت آئین و قانون کے خلاف چل کر مذاکرات کر ہی نہیں سکتی، ریاست کی حاکمیت اور ملکی سالمیت کو یقینی بنایا جائے گا۔ریاست کی حاکمیت اور عوامی حقوق ، معاشرتی اور معاشی استحکام کو مذاکرات میں ملحوظ خاطر رکھا جائے گا، مذاکرات میں علاقوں کے متاثر ہ افراد کو نظر انداز نہیں کیا جائے گا، لہذا ان علاقوں کے متاثرہ افراد کو اعتماد میں لیا جارہا ہے، مذاکرات میں پیشرفت کے مطابق فائربندی معاہدے میں بھی توسیع ہوتی جائے گی، افغان عبوری حکومت نے مذاکرات میں کردار ادا کیا۔

(جاری ہے)

یہ بات خوش آئندہ ہے پاکستان یہ علاقے ایک طویہ عرصے کے بعد مکمل امن کی طرف بڑھ رہے ہیں۔ یاد رہے اسپیکر قومی اسمبلی اسد قیصر کی زیرصدارت آج قومی سلامتی کی پارلیمانی کمیٹی کا اجلاس ہوا، اجلاس میں اعلیٰ عسکری حکام نے ملک کی سیاسی اور پارلیمانی قیادت کو بریفنگ دی، قومی سلامتی پارلیمانی کمیٹی کا اجلاس ہوا، قومی سلامتی کی پارلیمانی کمیٹی کے اجلاس میں کالعدم جماعت سے پابندی ہٹانے کے معاہدے اور کالعدم دہشتگرد تنظیم سے مذاکرات کا معاملہ بھی زیربحث آیا، اجلاس ساڑھے پانچ گھنٹے تک جاری رہا۔

اعلامیہ اجلاس کے مطابق اجلاس میں خطے میں وقوع پذیر تبدیلیوں، مسئلہ کشمیر اور پاک افغان سرحد پر بارڈر کنٹرول نظام بارے بریفنگ دی گئی۔ سیاسی و پارلیمانی قیادت نے اعلیٰ عسکری بریفنگ پر اطمینان کا اظہار کیا، بریفنگ میں بتایا گیا کہ پاکستان افغانستان کے معاملے پر عالمی برادری سے مسلسل رابطے میں ہے، پاکستان افغانستان میں امن کیلئے اپنا کردار ادا کرتا رہے گا، پاکستان برادر افغان عوام کی حمایت اور تائید جاری رکھے گا، افغانستان میں پائیدار امن واستحکام خطے کی ترقی و خوشحالی کیلئے ضروری ہے۔

امید ہے افغانستان کی سرزمین پاکستان کیخلاف استعمال نہیں ہوگی۔ اجلاس کے بعد وزیرداخلہ شیخ رشید نے میڈیا سے گفتگو کرتے ہوئے کہا کہ آج پارلیمانی قومی سلامتی کمیٹی کے اجلاس میں زبردست ماحول تھا، ایسے اجلاس ہوتے رہنے چاہئیں، لمبے سوال جواب اور کھل کر ساری باتیں ہوئیں، اجلاس ان کیمرا تھا اور اچھے ماحول میں ہوا، زیادہ ترکالعدم دہشتگرد تنظیم اور افغان صورتحا ل پر بات ہوئی، اجلاس سے متعلق سوال کیا گیا کہ کالعدم دہشتگرد تنظیم سے متعلق کوئی فیصلہ ہوا ؟ جس پر شیخ رشید نے جواب دیا اجلاس میں کالعدم دہشتگرد تنظیم سے متعلق کوئی فیصلہ نہیں ہوا، تاہم ان سے متعلق مذاکراتی معاہدہ  پارلیمنٹ میں لانے کا کہا گیا، اجلاس میں فضل الرحمان کے بیٹے نے اچھی باتیں کیں شاہ محمود قریشی نے بھی بات کی۔

ٹی ایل پی پر پابندی کل ہی اٹھائی تھی۔