Live Updates

جہانگیر ترین نے عمران خان کی حکومت گرانے کی دھمکی دی اور کوشش کی

جب شوگر انڈسٹری کی آمدنی کی شفافیت سے متعلق پوچھا گیا تو جہانگیر ترین نے باغی گروپ بنا لیا۔ وزیراعظم کے برطانیہ میں انویسٹمنٹ کے ترجمان صاحبزادہ جہانگیر

سمیرا فقیرحسین جمعہ 3 دسمبر 2021 10:29

جہانگیر ترین نے عمران خان کی حکومت گرانے کی دھمکی دی اور کوشش کی

لندن (اُردو پوائنٹ تازہ ترین اخبار۔ 03 دسمبر 2021ء) : وزیراعظم کے برطانیہ میں انویسٹمنٹ کے ترجمان صاحبزادہ جہانگیر کا کہنا ہے کہ وزیراعظم عمران خان کے قریبی ساتھی جہانگیر ترین نے ان کی حکومت گرانے کی دھمکی دی اور حکومت گرانے کی کوشش بھی کی۔ تفصیلات کے مطابق وزیراعظم کے برطانیہ میں انویسٹمنٹ کے ترجمان صاحبزادہ جہانگیر نے یہ بات گورنر پنجاب چودھری سرور کے اعزاز میں دیے جانے والے استقبالیہ سے خطاب کرتے ہوئے کہی۔

صاحبزادہ جہانگیر کا کہنا تھا کہ جب شوگر انڈسٹری کی آمدنی کی شفافیت سے متعلق دریافت کیا گیا تو جہانگیر ترین نے اپنا باغی گروپ بنا لیا۔ جہانگیر ترین نے احتساب سے بچنے کے لیے عمران خان کی حکومت گرانے کی دھمکی دی۔ ان کا کہنا تھا کہ عمران خان نے احتساب شروع کیا تو چوروں اور ڈاکوؤں نے بغاوت کردی۔

(جاری ہے)

وزیراعظم عمران خان کے برطانیہ میں سرمایہ کاری کے ترجمان صاحبزادہ جہانگیر کا کہنا تھا کہ چور اور ڈاکو ضمانتیں کروا کر معمول کی زندگیاں بسر کرنے کے لیے واپس لوٹ آتے ہیں۔

انہوں نے کہا کہ ایجوئیر روڈ اور پارک لین سابق پاکستانی حکمرانوں سے بھری ہوئی ہیں۔ تقریب سے خطاب میں ان کا کہنا تھا کہ پاکستان تحریک انصاف کے کارکنان عمران خان سے بد دل نہ ہوں اور عوام کو صبر کا درس دیں۔صاحبزادہ جہانگیر نے وزرا اور مشیران پر زور دیتے ہوئے کہا کہ اپنے اپنے حلقوں میں عوام کو صورتحال سے آگاہ کریں۔ خیال رہے کہ گورنر پنجاب چودھری سرور گذشتہ دنوں سے لندن میں موجود تھے ۔

گورنر پنجاب چودھری سرور نے لندن میں کئی عہدیداروں سے ملاقاتیں کیں جبکہ لندن میں گورنر پنجاب چودھری سرور کے اعزاز میں کئی تقاریب کا انعقاد بھی کیا گیا۔ گورنر پنجاب چوہدری سرور نے لندن میں قیام کے دوران ایک نیا پنڈورا باکس کھولا اور گذشتہ روز دئے گئے بیان میں کہا کہ آئی ایم ایف نے چھ ارب ڈالر قرض کے بدلے ہمارا سب کچھ لکھوا لیا ہے، دو ارب ڈالر سالانہ ملیں گے جو امداد نہیں قرض ہوگا۔ لندن میں عشائیے سے خطاب کرتے ہوئے چودھری سرور نے کہا کہ جس ملک میں سزا و جزا کا نظام نہیں وہ نہیں چل سکتا۔ ان کا کہنا ہے کہ پاکستان میں قیادت سے متفق نہ ہوں تو کہا جاتا ہے اختلاف ہو گئے۔