مجھے شہبازگل سے ملنے نہیں دیا گیا، پولیس کس سے آرڈر لے رہی ہے؟

اسلام آباد (اردوپوائنٹ اخبارتازہ ترین۔ 19 اگست 2022ء) پاکستان تحریک انصاف کے چیئرمین عمران خان نے کہا ہے کہ مجھے شہبازگل سے ملنے نہیں دیا گیا، پولیس کس سے آرڈر لے رہی ہے؟ عدالتی حکم کی کوئی فکر نہیں ،یہاں قانون کی حکمرانی ہے یا پھر ڈنڈے کی حکمرانی ہے؟ انہوں نے پمزہسپتال کے باہر میڈیا سے گفتگو کرتے ہوئے کہا کہ مجھے شہبازگل سے ملنے نہیں دیا گیا، میرا پہلا سوال ہے پولیس آخر کس سے آرڈر لے رہی ہے؟ کیا عدالت کے حکم کی کوئی حیثیت نہیں ہے،دوسرا سوال یہ ہے کہ بتایا جائے یہاں قانون کی حکمرانی ہے یا پھر ڈنڈے کی حکمرانی ہے؟ انہوں نے کہا کہ ساری قوم کو پیغام دینا چاہتا ہوں کہ شہبازگل کے لیے کل اسلام آباد میں ریلی نکال رہا ہوں، سب کو ریلی میں شرکت کی دعوت دیتا ہوں، اگر اس طرح کا تشدد ایک سیاسی ورکر پر ہوسکتا تو پھر تشدد کسی پر بھی ہوسکتا ہے، کل مغرب کے بعد ریلی نکالوں گا، سب شرکت کریں۔

(جاری ہے)

میڈیا کا منہ بن کرکے ، تشدد کرکے چوروں کو ہم پر مسلط کیا جارہا ہے، اس سے بہتر ہے چوروں کی غلامی سے بہتر ہے۔ دوسری جانب اسلام آباد پولیس نے عمران خان اور لیگل ٹیم کو شہبازگل سے ملاقات کی اجازت نہیں دی، ترجمان اسلام آباد پولیس نے ٹویٹر پر اپنے بیان میں کہا کہ ملزم شہباز شبیر کو پمز ہسپتال منتقل کردیا گیا ہے۔ اسلام آباد کیپیٹل پولیس نے ہسپتال میں سکیورٹی کا مناسب بندوبست کیا ہے۔

ہسپتال میں اضافی نفری بھی تعینات کردی گئی ہے۔ ترجمان نے کہا کہ ملزم جسمانی ریمانڈ پر نہیں ہے اور ملزم سے ملاقات کی اجازت نہیں ہے۔ ترجمان اسلام آباد پولیس نے کہا کہ عوام سے گزارش ہے کہ کسی قسم کی لاء اینڈ آرڈر کی صورتحال پیدا نہ کریں۔ کسی بھی لاء اینڈ آرڈر کی صورتحال بننے پر قانون کے مطابق کارروائی کی جائے۔ دوسری جانب چیئرمین پی ٹی آئی عمران خان شہبازگل سے ملاقات کرنے پمز ہسپتال پہنچ گئے، ان کے ہمراہ پارٹی رہنماء بھی ہمز ہسپتال گئے ہیں، لیکن اسلام آباد پولیس نے عمران خان اور لیگل ٹیم کو شہبازگل سے ملاقات کی اجازت نہیں دی۔

مزید برآں چیئرمین تحریک انصاف عمران خان کی زیر صدارت پارٹی کا مشاورتی اجلاس ہوا، اجلاس میں موجودہ سیاسی صورتحال اور آئندہ کی حکمت عملی پر مشاورت کی گئی۔ اجلاس میں شہباز گل پر تشدد پر سخت تشویش کا اظہار کیا گیا، اجلاس میں شہباز گل کو بھرپور قانونی و اخلاقی معاونت فراہم کرنے کا فیصلہ کیا گیا۔ چیئرمین پی ٹی آئی عمران خان نے قانونی ٹیم کو شہباز گل کا مقدمہ بھرپور انداز میں لڑنے کی ہدایت کی۔

اسی طرح عمران خان نے پارٹی رہنماوں کو 21 اگست کے جلسے کی بھرپور تیاریاں کرنے کی بھی ہدایت کی۔ عمران خان کل راولپنڈی سے ریلی کی قیادت کرینگے، ریلی راولپنڈی سے شروع ہوکر ایف نائن پارک پر اختتام  پذیر ہوگی۔ دوسری جانب پی ٹی آئی رہنماء بابر اعوان نے پریس کانفرنس کرتے ہوئے کہا کہ میں وضاحت کرنا چاہتا ہوں 2018 میں سپریم کورٹ نے طے کردیا ہے کہ سزا ہونے تک کسی کو الیکشن کمیشن نااہل نہیں کرسکتا، مریم اور نوازشریف کو سزا ہوچکی ہے، اس لیے مائنس عمران خان کرنے والوں کو منہ کی کھانی پڑے گی۔

ممنوعہ فنڈنگ کا کیس لوگ کہتے دو فیصلے تھے، ممنوعہ فنڈنگ کے قانون کے تحت ایک سزا ہے دوسری سزا نہیں ہوسکتی، ایک سزا یہ ہے جو کہ فنڈ ضبط ہوسکتے ہیں، دوسری یا تیسری کوئی سزا نہیں ہے، دوسرا طریقہ جو یہ کرنا چاہتے ہیں وہ پاکستان کی تاریخ کا بے رحمانہ طریقہ ہے، جس کے تحت شہباز گل کو گرفتار کیا ہے، شہباز گل ٹیچر ہے، پڑھا لکھا شخص ہے ۔اپوزیشن کو کہتا ہوں جاؤ اصغر خان کیس کو پڑھو، شہبازگل کے پرچے کے خلاف پوری تحریک انصاف کھڑی ہے۔

انہوں نے کہا کہ کوئی خوش فہمی میں نہ رہے، پاکستان تحریک انصاف کو کوئی نقصان نہیں ہوگا، جن لوگوں نے اپنا نقطہ نظر پیش کیا وہ تحریک انصاف کی پالیسی نہیں ہے۔ ہم سمجھتے ہیں شہباز گل تحریک انصاف کے لیے ایسا آدمی ہے جس نے سب کچھ قربان کردیا ہے، ہم سمجھتے ہیں شہباز گل تحریک انصاف کا اثاثہ ہیں، پاکستان تحریک انصاف شہباز گل پر ظلم کے خلاف آئینی، قانونی اور پالیمانی ہرجگہ آواز اٹھائیں گے۔ انہوں نے اعلان کیا کہ تحریک انصاف شہباز گل کی رہائی کیلئے کل ریلی نکالے گی، عمران خان کل شہباز گل سے ملاقات کیلئے جائیں گے، عمران خان شہباز گل کی عیادت کرنے جائیں گے، شہبازگل پراپیگنڈے سے تحریک انصاف کا کوئی نقصان نہیں ہوگا۔