Live Updates

پی ایس ایل کو قومی اثاثہ قرار دیا جا رہا ہے، نجم سیٹھی

پی ایس ایل کی وجہ سے بزنس بڑھتا ہے، ایسے ایونٹس پر زیادہ سے زیادہ خرچ کرنا چاہیے، چیئر مین پی سی بی

ہفتہ 18 مارچ 2023 20:55

لاہور (اُردو پوائنٹ اخبارتازہ ترین - این این آئی۔ 18 مارچ2023ء) پاکستان کرکٹ بورڈ (پی سی بی) مینجمنٹ کمیٹی کے چیئرمین نجم سیٹھی نے کہا ہے کہ پی ایس ایل کو قومی اثاثہ قرار دیا جا رہا ہے،پی ایس ایل کی وجہ سے بزنس بڑھتا ہے، ایسے ایونٹس پر زیادہ سے زیادہ خرچ کرنا چاہیے۔میڈیا سے گفتگو کرتے ہوئے نجم سیٹھی نے کہا کہ پی ایس ایل کامیاب بنانے کیلئے تعاون کرنے پر سب کا شکریہ ادا کرتے ہیں۔

انہوں نے کہا کہ ہائیکورٹ نے بھی کہا کہ پی ایس ایل کو ڈسٹرب نہیں کرنا، پی ایس ایل کو قومی اثاثہ قرار دیا جا رہا ہے۔چیئرمین مینجمنٹ کمیٹی نے کہا کہ غیر ملکی کھلاڑیوں اور غیر ملکی ٹیکنیشنز کا مشکور ہوں، سات ممالک کے لگ بھگ دو سو افراد یہاں موجود تھے، امریکا سے آئے براڈ کاسٹنگ سے منسلک ایک شخص نے پی ایس ایل کو کامیاب قرار دیا۔

(جاری ہے)

انہوں نے کہا کہ پی ایس ایل میں فینز 80 فیصد تک آئے انہوں نے اسے ایک گلوبل برانڈ بنا دیا، ملتان میں بہت سپورٹ ملی وہاں لاجسٹک کی مشکلات پیش آئیں، افتتاحی تقریب ملتان میں کرنا بہت مشکل تھا، 7 ایڈیشنز میں یہ تقریب سب سے بہترین تھی۔

نجم سیٹھی نے کہا کہ جب میں 22 دسمبر کو آیا تو افتتاحی تقریب سے متعلق کچھ نہیں کیا گیا تھا، برانڈنگ کیلئے ایک لاکھ روپے رکھا گیا تھا جو میرے لیے حیران کن تھا، ہم نے ایک ماہ کے اندر تمام کام مکمل کیے، میں خود اس حوالے سے دبئی گیا۔انہوں نے کہا کہ فرنچائزز نے بھی 50 فیصد حصہ ڈالا ہم نے اس کا بجٹ 10 گنا بڑھایا، ٹکٹ کی ریکارڈ سیل ہوئی، ڈیجیٹل پر ریٹنگ 10 پر گئی، ہم ڈیجیٹل سے متعلق آئی پی ایل سے آگے رہے۔نجم سیٹھی نے کہا کہ ہم 50 کروڑ کے سیلز ٹیکس دیتے ہیں، صوبائی ٹیکس بھی اتنے ہوتے ہیں، پی ایس ایل کی وجہ سے بزنس بڑھتا ہے، ایسے ایونٹس پر زیادہ سے زیادہ خرچ کرنا چاہیے۔چیئرمین مینجمنٹ کمیٹی نے کہا کہ چار وینیوز پر میچز کرانا آسان نہیں تھا۔