پاکستان کرکٹ ٹیم کے پہلے کپتان عبدالحفیظ کاردار پی سی بی ہال آف فیم میں شامل

ہفتہ 15 اپریل 2023 15:26

لاہور (اُردو پوائنٹ اخبارتازہ ترین - این این آئی۔ 15 اپریل2023ء) پاکستان کرکٹ ٹیم کے اولین کپتان عبدالحفیظ کاردار کو پی سی بی ہال آف فیم میں شامل کر لیا گیا۔پاکستان کرکٹ بورڈ (پی سی بی)نے قومی ٹیم کے پہلے ٹیسٹ کپتان عبد الحفیظ کاردار کو پی سی بی ہال آف فیم میں شامل کیا ہے۔

(جاری ہے)

پی سی بی مینجمنٹ کمیٹی کے چیئرمین نجم سیٹھی نے پاک نیوزی لینڈ ٹی ٹونٹی میچ سے قبل مرحوم عبد الحفیظ کاردار کے صاحبزادے شاہد حفیظ کاردار کو سوونیئر پیش کیا اور کیپ بھی دی۔

واضح رہے کہ پاکستان نے اپنا پہلا ٹیسٹ میچ 16اکتوبر 1952ء کو عبد الحفیظ کاردار کی کپتانی میں بھارت کے خلاف کھیلا تھا۔انہوں نے 1952ء سے 1958ء کے درمیان پاکستان کی جانب 23 ٹیسٹ میچ کھیلے اور تمام میچز میں کپتانی کا بھی اعزاز حاصل کیا۔عبد الحفیظ کاردار 21اپریل 1996ء میں انتقال کر گئے تھے۔