کل جماعتی حریت کانفرنس آزاد جموں و کشمیر کے کنوینر محمود احمد ساغر کا حریت رہنمائوں یاسمین راجہ اور زمردہ حبیب کی گرفتاری پر شدید تشویش کا اظہار

اسلام آباد (اُردو پوائنٹ اخبارتازہ ترین - اے پی پی۔ 19 مئی2023ء) کل جماعتی حریت کانفرنس آزاد جموں و کشمیر کے کنوینر محمود احمد ساغر نے حریت رہنمائوں یاسمین راجہ اور زمردہ حبیب کی گرفتاری پر شدید تشویش کا اظہار کیا ہے ۔ جمعہ کو اسلام آباد میں جاری ایک بیان میں انہوں نے کہا کہ مقبوضہ علاقے میں خوف و دہشت کا ماحول قائم کرنے کیلئے حریت رہنمائوں کو جھوٹے الزامات کے تحت گرفتار کیا جاتا ہے۔

انہوں نے کہاکہ بھارت کے غیر قانونی زیر قبضہ جموں و کشمیرمیں کشمیری حریت قیادت اور حریت پسند عوام کے خلاف مودی حکومت فوجی آپریشن جاری رکھے ہوئے ہے، گزشتہ روز بھارتی فوج نے شبیر احمد شاہ اور دیگر کے گھروں پر چھاپے مار کر توڑ پھوڑ کی تھی اور اہلخانہ کو ہراساں کرنے کے علاوہ مکانوں کی اہم دستاویزات قبضے میں لے لئے تھے ۔

(جاری ہے)

محمود احمد ساغر نے بھارتی فوج کی اس کارروائی کی شدید مذمت کرتے ہوئے کہا کہ حریت رہنمائوں اور کارکنوں کے خلاف بھارتی پولیس کی اس طرح کی انتقامی کارروائیاں انتہائی افسوسناک ہیں ۔

انہوں نے واضح کیاکہ اس طرح کی انتقامی کارروائی کے ذریعے حریت قائدین کے جذبہ آزادی کو کمزور نہیں کیا جاسکتا ۔محمود ساغرنے حریت رہنمائوں اور کارکنوں کی مسلسل غیر قانونی نظربندی کو بنیادی انسانی حقوق کی سنگین خلاف ورزی قراردیتے ہوئے کہا کہ بھارتی حکومت گرفتاریوں کو جموں و کشمیر میں اختلاف رائے کو دبانے کیلئے ایک ہتھیار کے طورپر استعمال کر رہی ہے۔

انہوں نے کہا کہ اس طرح کے ظالمانہ اقدامات سے بھارت اپنے مذموم عزائم میں کبھی کامیاب نہیں ہوگا۔ انہوں نے کہا کہ بھارتی حکومت نے مقبوضہ علاقے تک رسائی نہ دیکر انسانی حقوق کی بین الاقوامی تنظیموں کیخلاف باضابطہ مہم جاری رکھی ہوئی ہے۔ انہوں نے کہا کہ اقوام متحدہ کی سلامتی کونسل اور انسانی حقوق کی بین الاقوامی تنظیموں پرزوردیا کہ وہ کشمیری حریت رہنمائوں کی فوری رہائی کیلئے بھارت پر دبائو ڈالیں۔