یواین جنرل اسمبلی سے مودی کا خطاب،کشمیریوں اور سکھوں کا سخت احتجاج،بھارتی تسلط سے آزادی تک جدوجہد جاری رکھیں گے،صدر اے جے کے بیرسٹر سلطان محمود چوہدری

اسلام آباد (اُردو پوائنٹ اخبارتازہ ترین - اے پی پی۔ 27 ستمبر2023ء) صدر آزادجموں وکشمیر بیرسٹر سلطان محمود چوہدری کی کال پر اقوام متحدہ کی جنرل اسمبلی سے بھارتی وزیر اعظم نریندر مودی کے خطاب کے موقع پر نیویارک میں یواین آفس کے سامنے ہزاروں کشمیریوں نے مودی کے خلاف زبردست احتجاجی مظاہرہ کیا ، مظاہرین گو مودی گو، کشمیریوں کا قاتل مودی، مودی قصائی، لے کے ر ہیں گے آزادی ہے حق ہمارا آزادی، کشمیر کشمیریوں کا ہے، اقوام متحدہ کشمیریوں کو اُن کا حق خودارادیت دے جیسے فلک شگاف نعرے لگا رہے تھے ،انہوں نے آزادکشمیر کے جھنڈے اُٹھا رکھے تھے ،کشمیریوں کے مظاہرے میں سکھوں ، خواتین اور بچوں کی ایک بڑی تعداد بھی شریک تھی ،شدید بارش اور سرد موسم کے باوجود پورے امریکا سے لوگ اس مظاہرے میں شریک ہوئے۔

(جاری ہے)

صدارتی دفتر سے جاری بیان کے مطابق مظاہرے سے صدر آزادجموں وکشمیر بیرسٹر سلطان محمود چوہدری نے اسلام آباد سے ویڈیو لنک کے ذریعے خطاب کرتے ہوئے کہا کہ مقبوضہ کشمیر میں بھارت نے مظالم کی انتہا کر دی ہے ،بھارت مقبوضہ جموں و کشمیر میں 5اگست2019ء کے بعد سے لے کر اب تک بڑے پیمانے پر تبدیلیاں کر رہا ہے جس میں چالیس لاکھ سے زائد غیرریاستی ہندوؤں کو جعلی ڈومیسائل جاری کیے گئے اور وہاں کی حلقہ بندیاں تبدیل کی گئی ہیں جس سے وہ مقبوضہ کشمیر میں ایک ہندو وزیر اعلیٰ لانے کی راہ ہموار کر رہا ہے تاکہ وہ مسئلہ کشمیر کو ختم اور مقبوضہ کشمیر کو ہڑپ کر سکے لیکن اب بھارت جان لے کہ وہ کشمیری عوام کے جذبہ حریت کو اپنے توپ و تفنگ سے ختم نہیں کر سکتا اور کشمیری عوام کی جدوجہد مقبوضہ کشمیر کی آزادی تک جاری و ساری رہے گی۔

صدر نے کہا کہ مسئلہ کشمیر اقوام متحدہ کے ایجنڈے پر سب سے پرانا حل طلب مسئلہ ہے لہذا اقوام متحدہ کشمیری عوام کو اُن کا حق خودارادیت دلوانے کے لئے اپنا کردار ادا کرے۔ بیرسٹر سلطان محمود چوہدری نے کہا کہ بھارت جہاں مقبوضہ جموں و کشمیر میں ظلم و بربریت کر رہا ہے وہاں خود بھارت میں بھی اقلیتیں مودی سرکار کے ظلم و ستم کا شکار ہیں ، حال ہی میں کینیڈا میں سکھ رہنما کے قتل میں بھارت اور اُس کی خفیہ ایجنسی را کے ملوث ہونے کے ناقابل تردید ثبوت کینیڈین وزیر اعظم کی طرف سے اپنی پارلیمنٹ میں پیش کرنے کے بعد اب یہ مہر ثبت ہو گئی ہے کہ بھارت ایک عالمی دہشت گرد بن چکا ہے اور امریکا، برطانیہ، یورپ سمیت دیگر ممالک نے اس کی بھرپور مذمت کی ہے۔

انہوں نے کہا کہ بھارت نے مقبوضہ جموں و کشمیر میں عوام پر عرصہ حیات تنگ کر دیا ہے اور اسی طرح بھارتی ریاست منی پور میں بھی عیسائیوں پر بربریت کی انتہاء کر دی ہے یہاں تک کہ خواتین کو برہنہ کر کے سرعام گھمایا گیا جس سے بھارت کے دنیا کے سب سے بڑے جمہوریت اور سیکولر سٹیٹ ہونے کے دعوے کی قلعی کھل چکی ہے اور اُس کا مکروہ چہرہ دنیا کے سامنے آشکار ہو چکا ہے۔

صدر ریاست نے کہا کہ میں 1984ء سے نیویارک آرہا ہوں اور ہر سال اقوام متحدہ کے دفتر کے سامنے مظاہرے میں شریک ہو تا ہوں آج جبکہ میں ویڈیو لنک کے ذریعے اس مظاہرے سے خطاب کررہا ہوں تو میں یہ کہنا چاہتا ہوں کہ آج جہاں ہم مقبوضہ جموں و کشمیر کے عوام کے ساتھ یکجہتی کااظہار کر رہے ہیں ،وہاں مودی سرکار جو کہ ہندوتوا پالیسیوں پر گامزن ہے کو بھی انٹرنیشنل کمیونٹی کے سامنے بے نقاب کر رہے ہیں اور دنیا کی توجہ مقبوضہ کشمیر میں جاری مظالم کی جانب مبذول کرا رہے ہیں۔

انہوں نے کہا کہ میں جلد ہی بیرونی ممالک کا دورہ کروں گا اور مودی کی ریشہ دوانیوں کو دنیا کے سامنے بے نقاب کروں گا۔ صدر ریاست نے کہا کہ میں مسئلہ کشمیر کے اس نازک اور اہم موڑ پردنیا بھر میں آباد کشمیریوں بالخصوص امریکا، برطانیہ اور یورپ میں آباد کشمیریوں سے کہوں گا کہ وہ مودی سرکار کی جانب سے مقبوضہ جموں و کشمیر میں جاری انسانی حقوق کی پامالیوں کو عالمی سطح پر بے نقاب کرنے کے لئے کمر بستہ ہو جائیں۔\932