شرجیل انعام میمن کی این اے 171 رحیم یار خان پر پیپلز پارٹی امیدوار مخدوم طاہر رشید کو کامیابی پر مبار ک باد

طاہر رشید کی جیت اس بات کا ثبوت ہے کہ پنجاب کے عوام نے چیئرمین بلاول بھٹو زرداری کے نظرئے اور بیانئے کی تائید کی ہے،سینئر صوبائی وزیر

جمعہ 13 ستمبر 2024 20:42

شرجیل انعام میمن کی این اے 171 رحیم یار خان پر پیپلز پارٹی امیدوار مخدوم ..

کراچی (اُردو پوائنٹ اخبارتازہ ترین - این این آئی۔ 13 ستمبر2024ء) سندھ کے سینئر وزیر شرجیل انعام میمن نے این اے 171 رحیم یار خان پر پیپلز پارٹی امیدوار مخدوم طاہر رشید کو کامیابی پر مبارک باد دیتے ہوئے کہا کہ این اے 171 رحیم یار خان میں ضمنی انتخابات میں پی ٹی آئی کو بدترین شکست ملی ہے، کل ہونے والے انتخابات میں کسی کو بھی فارم 45 اور فارم 47 کی بنیاد پر الزام تراشی کا موقعہ نہیں ملا۔

ایک بیان میں سینئر وزیر شرجیل انعام میمن نے کہا کہ مخدوم طاہر رشید کی جیت اس بات کا ثبوت ہے کہ پنجاب کے عوام نے چیئرمین بلاول بھٹو زرداری کے نظرئے اور بیانئے کی تائید کی ہے، چیئرمین بلاول بھٹو زرداری کی قیادت میں پیپلز پارٹی ملک بھر میں نفرت، تقسیم اور الزام تراشیوں کی سیاست کو دفن کر دے گی۔

(جاری ہے)

سینئر وزیر شرجیل انعام میمن نے کہا کہ پیپلز پارٹی کی قیادت چاہتی ہے کہ ملک و قوم کو درپیش مسائل کے حل کے لئے سب مل کر کردار ادا کریں، این اے 171 پر پیپلز پارٹی کی تاریخی جیت پاکستان میں ایک نئی اور مثبت سیاست کی ابتدا ہے۔

انہوں نے کہا کہ این اے 171 پر پیپلز پارٹی کے امیدوار مخدوم طاہر رشید کی جیت پنجاب میں پاکستان پیپلز پارٹی کے وژن، قیادت اور عوام نواز پالیسیوں کی واضح توثیق ہے، رحیم یار خان کے عوام نے ایک بار پھر تیر پر اعتماد کیا ہے جو امید، ترقی اور جمہوریت سے وابستگی کی علامت ہے۔سینئر وزیر شرجیل انعام میمن نے کہا کہ چیئرمین بلاول بھٹو زرداری کی قیادت میں پیپلز پارٹی نے عام آدمی کے حقوق کی پاسداری اور پسماندہ طبقات کی بہتری کے لیے انتھک محنت کرتی رہی ہے ، چیئرمین بلاول بھٹو زرداری اور صدر آصف علی زرداری کی متحرک قیادت میں ہم مل کر پاکستان کو مزید خوشحال اور انصاف پسند قوم بنانے کا سفر جاری رکھیں گے۔

انہوں نے کہا کہ پیپلز پارٹی عوام کے ساتھ کھڑی رہے گی، ترقی، استحکام اور سب کے روشن مستقبل کے لیے کوشاں رہے گی۔