Live Updates

پی ٹی آئی کا ڈی چوک میں احتجاج ملکی مفاد میں نہیں

احتجاج کی کال پر یہ پارٹی اینٹی اسٹیٹ ہی کہلائے گی، مصطفیٰ کمال

اتوار 13 اکتوبر 2024 13:20

پی ٹی آئی کا ڈی چوک میں احتجاج ملکی مفاد میں نہیں

کراچی(اُردو پوائنٹ اخبارتازہ ترین - این این آئی۔ 13 اکتوبر2024ء) متحدہ قومی موومنٹ پاکستان کے رہنما مصطفی کمال نے کہا ہے کہ پی ٹی آئی کا ڈی چوک میں احتجاج کا اعلان ملکی مفاد میں نہیں، ہماری سیاست اور پارٹی ملک کی سالمیت سے اوپر نہیں، نعرہ آپ نے لگا دیا ہے کہ بانی پی ٹی آئی نہیں تو پاکستان نہیں، ہم بھی نعرے لگاتے تھے منزل نہیں رہنما چاہیے، ہم بھی پاگلوں کی طرح لگے ہوئے تھے،رہنما کو چاٹنا ہے ہمیں اگر منزل نہیں ملے، ہمیں منزل چاہیے بھائی، پی ٹی آئی پر اینٹی اسٹیٹ ہونے کا الزام لگتا ہے۔

کراچی میں پریس کانفرنس کرتے ہوئے مصطفی کمال نے کہا کہ ہم حکومت وقت سے اپنی کچھ گزارشات کرنا چاہتے ہیں، مہنگائی، بیروزگاری اور معاشی حالات سب کے سامنے ہیں، حکومت اور تمام ریاستی ادارے مل کر معاشی حالات کو بہتر بنانے کی کوشش کر رہے ہیں۔

(جاری ہے)

ماننا پڑے گا ملک میں میکرو اکنامک استحکام آیا ہے، ڈالر ایک جگہ رک گیا ہے، ہم مہنگائی میں سنگل ڈیجٹ پر آگئے ہیں، آج کے دور میں یہ روشنی کی کرن ہے، آئی ایم ایف کے ساتھ نیا معاہدہ ہوچکا ہے، گزشتہ دنوں دوست ممالک سے سرمایہ کاری کیلئے وفد آنا شروع ہوگئے ہیں، استحکام کا ایک سلسلہ چل پڑا ہے۔

انہوں نے کہاکہ اس ماہ اسلام آباد میں شنگھائی تعاون تنظیم کا سربراہی اجلاس ہو رہا ہے، مختلف ممالک کے وفود پاکستان آئیں گے، ملک دنیا کی نظروں میں ہوگا، دنیا بھر کے سرمایہ کار پاکستان کو دیکھ رہے ہوں گے، بیرون ملک اور لوکل کا پاکستان میں سرمایہ کاری کیلئے اعتماد بڑھے گا۔ایم کیو ایم رہنما نے کہا کہ پی ٹی آئی نے 15 اکتوبر کو اسلام آباد میں احتجاج کا اعلان کیا ہے، پی ٹی آئی کا ڈی چوک میں احتجاج کا اعلان ملکی مفاد میں نہیں، ریڈزون کو سکیورٹی زون قرار دے کر سکیورٹی نے حصار میں لے لیا ہے، احتجاج سیاست اور جمہوریت کا حصہ ہے، ہماری سیاست اور پارٹی ملک کی سالمیت سے اوپر نہیں، ملک ہے تو ہماری سیاست اور جمہوریت ہے۔

مصطفی کمال نے کہا کہ ملک اور ادارے ہیں تو ہم چین سے سانس لے رہے ہیں، جس ملک سے ریاستی اداروں اور فوج کو ختم کر دیا جائے تو وہ ملک لیبیا اور عراق بن جاتا ہے، جب سے حکومت گئی بانی پی ٹی آئی عمران خان نے ریاستی ادارے کو ڈائریکٹ ہٹ کیا ہے، پی ٹی آئی کے احتجاج کی کال پر یہ پارٹی اینٹی اسٹیٹ ہی کہلائے گی۔انہوں نے کہا کہ پاکستان میں اندرونی طور پر ایک جنگ مسلط کر دی گئی ہے، پی ٹی آئی نے جمہوریت کا نام دے کر احتجاجی مہم کو پاکستان کے خلاف استعمال کرنا شروع کر دیا ہے، ریاست اور اداروں کو کھوکھلا کرنے کی اجازت کسی کو نہیں، آپ اسرائیل کے ایجنڈے پر عمل پیرا ہیں، تاریخ میں پہلی بار اسرائیل کے اخباروں میں کسی لیڈر کی تعریف میں آرٹیکل لکھے گئے۔

انہوں نے کہا کہ فلسطینیوں اور کشمیریوں کیلئے پاکستان ہی آخری امید ہے۔