بانی پی ٹی آئی نے نوجوانوں میں بے حیائی اور بدتمیزی بڑھائی، کیپٹن صفدر

ترسیلات زرروکنے کی کال 9مئی سے بڑاحملہ ہے،بانی جلسوں میں دوسروں کے بچوں کو مرواتے ہیں،پشاور میں استقبالیہ تقریب سے خطاب

اتوار 12 جنوری 2025 20:15

پشاور(اُردو پوائنٹ اخبارتازہ ترین - این این آئی۔ 12 جنوری2025ء) پاکستان مسلم لیگ (ن)کے رہنما کیپٹن (ر)محمد صفدر نے کہا ہے کہ بانی پی ٹی آئی نے نوجوانوں میں بے حیائی اور بدتمیزی بڑھائی ہے۔پشاور میں ایم پی اے ملک طارق اعوان کی استقبالیہ تقریب سے خطاب کرتے ہوئے کیپٹن (ر)صفدر نے کہاکہ پنجاب میں ترقی ہو رہی ہے یہاں کوئی کام نہیں ہو رہا،پی ٹی آئی نے ملک طارق کو وزیر بنانے کی پیشکش کی مگر انہوں نے انکار کر دیا۔

انہوںنے کہاکہ بانی پی ٹی آئی سے پوچھتا ہوں کہ انہوں نے ابھی تک یہاں کیا کام کیا ہی یہاں کوئی آئی ٹی یونیورسٹی یا کوئی ہسپتال بنایا ہی ۔انہوں نے کہاکہ بانی پی ٹی آئی نے ترسیلات زر روکنے کی کال دی، یہ 9 مئی سے بڑا حملہ ہے۔کیپٹن (ر)صفدر نے کہا کہ الیکشن اپنے وقت پر ہوں گے، پی ٹی آئی کے پاس دھمکیوں کے علاوہ کچھ نہیں۔

(جاری ہے)

انہوں نے کہا کہ پشاور کی صحافی برادری نے میرا مشکل وقت میں بہت ساتھ دیا ہے، شہباز شریف خیبر پختونخوا کو ترقی کی راہ پر گامزن کریں گے، کے پی اپنے محل و قوع کے باعث پنجاب سے زیادہ کامیاب صوبہ بن سکتا ہے۔

کیپٹن صفدر نے کہاکہ یہ صوبہ آگے جائے گا، یہاں وسائل کی کمی نہیں۔انہوںنے کہاکہ بانی پی ٹی آئی نے نوجوانوں میں بے حیائی اور بدتمیزی بڑھائی ہے، وہ اپنے جلسوں میں دوسروں کے بچوں کو مرواتے ہیں مگر اپنے بچے انگلینڈ میں ہیں۔