پشاور، سابق صوبائی وزیراورجے یو آئی (ف) کے رہنما رحمت سلام خٹک کا مسلم لیگ (ن) میں شمولیت کا اعلان

ہفتہ 25 جنوری 2025 18:10

پشاور (اُردو پوائنٹ اخبارتازہ ترین - اے پی پی۔ 25 جنوری2025ء) سابق صوبائی وزیراورجے یو آئی (ف) کے رہنما رحمت سلام خٹک نے اپنے ساتھیوں سمیت مسلم لیگ (ن) میں شمولیت کا اعلان کیا ہے ،اس موقع پروفاقی وزیرسیفران اورصدرمسلم لیگ (ن) خیبرپختونخوا انجینئرامیرمقام ، لیگی رہنما کیپٹن (ریٹائرڈ) صفدر، سابق گورنرکے پی اقبال ظفرجھگڑا، اراکین صوبائی اسمبلی اور مسلم لیگ (ن) کے دیگر رہنما بھی موجود تھے۔

(جاری ہے)

شمولیتی تقریب کے بعد پریس کانفرنس سے خطاب کرتے ہوئے انجینئرامیرمقام نے کہا کہ مسلم لیگ (ن )کی حکومت ملک کومعاشی اوردیگر بحرانوں سے نکالنے کے لیے پرعزم ہے، امیرمقام نے کہا کہ حکومت کی مضبوط پالیسیوں کی وجہ سےمعیشت استحکام کی راہ پرگامزن ہے اورعوام کو ریلیف فراہم کرنے کے لیے تھوس اقدامات کیے جا رہے ہیں، انھوں نے نے کہا کہ بد قسمتی سے کے پی حکومت نے صوبے کی ترقی کے لیے کچھ نہیں کیا، کے پی کے وزیراعلیٰ دوسرے صوبوں کا مقابلہ کریں تواچھا ہوگا لیکن ان کی ترجیح ترقی اورخوشحالی نہیں ہے، انہوں نے کہا کہ ہم نے پی ڈی ایم حکومت کے دوران ملک کو ڈیفالٹ سے بچایا ، وزیراعظم شہبازشریف کی انتھک کوششوں سے ملک میں سرمایہ کاری آرہی ہے، انہوں نے کہا کہ سوات موٹروے کی منظوری سابق وزیر اعظم محمد نواز شریف نے دی تھی جس پربعد میں پی ٹی آئی نے کام روک دیا تھا، اس موقع پرکیپٹن صفدرنے خیبرپختونخوا میں مسلم لیگ (ن )کی جانب سے مکمل کیے گئے مختلف منصوبوں پرروشنی ڈالی، انہوں نے کہا کہ مسلم لیگ (ن) کی قیادت پنجاب کی طرح خیبرپختونخوا میں بھی ترقی اورخوشحالی لائے گی، انہوں نے کہا کہ ہم صوبہ خیبر پختونخوا کو کامیاب دیکھنا چاہتے ہیں، کیپٹن صفدر نے کہا کہ جب امیرمقام وزیراعلیٰ بنیں گے تواس صوبے کو عظیم بنائیں گے، قبل ازیں وفاقی وزیرانجینئرامیرمقام نے رحمت سلام خٹک کو مسلم لیگ (ن) کی ٹوپی پہنائی، اس موقع پرمسلم لیگ (ن) کے کارکنان اورصوبائی وضلعی قیادت کی بڑی تعداد بھی موجود تھی۔