Live Updates

آئندہ بجٹ میں عوام کو مزید خوشخبریاں دیں گے، رانا مشہود

وزیراعظم کی مدبررانہ قیادت اور حکومت کی مثبت پالیسیوں کی بدولت ملک ترقی کی راہ پر گامزن ہو چکا ہے، پاکستان میں بیرونی سرمایہ کاری آرہی ہے؛ چیئرمین یوتھ پروگرام کا تقریب سے خطاب

Sajid Ali ساجد علی اتوار 26 جنوری 2025 16:00

آئندہ بجٹ میں عوام کو مزید خوشخبریاں دیں گے، رانا مشہود
لاہور ( اُردو پوائنٹ اخبارتازہ ترین۔ 26 جنوری 2025ء ) چیئرمین وزیر اعظم یوتھ پروگرام رانا مشہود احمد خان نے کہا ہے کہ ملک ترقی کی راہ پر گامزن ہو چکا ہے، مخالفین کی ترقی کا سفر روکنے کی تمام تر سازشیں ناکام ہوچکی ہیں، معاشی ترقی کے لیے کوششوں کے ثمرات سامنے آ رہے ہیں، ترکیہ کے صدر جلد پاکستان کا دورہ کریں گے،آئندہ بجٹ میں عوام کو مزید خوشخبریاں دیں گے۔

لاہور کے علاقہ گلشن راوی میں تقریب سے خطاب کرتے ہوئے انہوں نے کہا کہ وزیر اعظم محمد شہباز شریف کی مدبررانہ قیادت اور حکومت کی مثبت پالیسیوں کی بدولت ملک ترقی کی راہ پر گامزن ہو چکا ہے، پاکستان میں بیرونی سرمایہ کاری آرہی ہے اور تمام تر معاشی اشاریے مثبت ہیں، سٹاک مارکیٹ نے نئے ریکارڈ قائم کیے، اڑان پاکستان پروگرام ملکی ترقی میں کلیدی کردار ادا کرے گا، وزیر اعظم ملک کو بحرانوں سے نکالنے کے لیے دن رات کوشاں ہیں، ہمارا ہدف اس ملک کو اور عوام کو خوشحال بنانا ہے، آئندہ بجٹ میں عوام کو مزید سہولیات فراہم کی جائیں گی۔

(جاری ہے)

مسلم لیگ ن کے رہنماء کا کہنا ہے کہ حکومت معاشی استحکام کے ساتھ ساتھ عوام کو بنیادی سہولیات کی فراہمی کے لیے بھی تمام وسائل بروئے کا ر لارہی ہے جس سے عام آدمی کا معیار زندگی بلند ہو رہا ہے، مسلم لیگ ن ہمیشہ ملک کو بحرانوں سے نکال کر ترقی اور خوشحالی کے راستے پر گامزن کرنے میں کامیاب ہوئی ہے اور اب بھی مہنگائی پر قابو پانے کے لیے کوششیں جاری ہیں، جس کے اثرات عام آدمی تک پہنچنا شروع ہو چکے ہیں، مسلم لیگ ن جب بھی اقتدار میں آتی ہے تو ملک بھر میں ترقیاتی منصوبے شروع ہو جاتے ہیں جو پارٹی قیادت کی عوام دوستی اور ملکی تعمیر و ترقی کی ضامن ہونے کا واضح ثبوت ہے۔

انہوں نے کہا کہ سابق دور حکومت میں ایک ٹولے نے پاکستان کی نظریاتی اساس پر حملے کیے، پاکستان کو شام ایران بنانے، قومی اداروں کو مفلوج کرنے، امریکہ میں پاکستان کے خلاف قرار دادیں پاس کروانے کی کوشش کی، آئی ایم ایف سے ڈیل کو ناکام کرنے کی کوشش کی، آئی ایم ایف کے باہر احتجاج کیا گیا، سول نافرمانی اور ملک میں دنگا فساد کروانے کی کوشش کی گئی، ملک کو ناقابل تلافی نقصان پہنچایا اور ملکی معیشت کا جنازہ نکال کر رکھ دیا، دوست ممالک ناراض ہو گئے، بیرون سرمایہ کاری رک گئی، ملک دیوالہ ہونے کے قریب چلا گیا، ہم نے اپنی سیاست کی پروا کیے بغیر ملک کو دیوالیہ ہونے سے بچایا اوران کی تمام سازشیں ناکام ہو گئیں۔

رانا مشہود کہتے ہیں کہ حکومت تجارت اور سرمایہ کاری میں اضافے کی پالیسیوں پر عمل پیرا ہے، عالمی سطح پر پاکستان کے وقار میں اضافہ ہوا، جلد ترکی کے صدر پاکستان کا دورہ کریں گے، حکومت ماضی کی طرح قرض نہیں لے رہی بلکہ سرمایہ کاری کو ترجیح دے رہی ہے، پبلک اور پرائیویٹ سیکٹر بیرونی ممالک سرمایہ کاری کر رہے ہیں جس سے ملک میں مزید سرمایہ اور خوشحالی آئے گی، قائد محمد نواز شریف کے ویژن کے مطابق وزیر اعظم دن رات محنت کرکے پاکستان کی مخالف قوتوں کو ایک ہی جواب دے رہے ہیں کہ پاکستان کی ترقی کو اب کوئی نہیں روک سکتا، پاکستان کے خلاف سازش کرنے والوں کا اب کوئی والی وارث نہیں ہے۔
Live مہنگائی کا طوفان سے متعلق تازہ ترین معلومات