۷جی ڈی اے قیادت سے اپوزیشن اتحاد تحریک تحفظ آئین پاکستان کے رہنمائوں کی محمود اچکزئی کی سربراہی میں ملاقات

کراچی (اُردو پوائنٹ اخبارتازہ ترین - آن لائن۔ 22 فروری2025ء)سابق اسپیکر قومی اسمبلی اور تحریک انصاف (پی ٹی آئی) کے مرکزی رہنما اسد قیصر نے کہا ہے کہ پیپلز پارٹی نے بہت مایوس کیا ہے۔کراچی میں گرینڈ ڈیموکریٹک الائنس (جی ڈی ای) کی قیادت سے اپوزیشن اتحاد تحریک تحفظ آئین پاکستان کے رہنماوں نے محمود اچکزئی کی سربراہی میں ملاقات کی۔ملاقات میں اسد قیصر، سلمان اکرم راجا، سردار لطیف کھوسہ، صدر الدین شاہ راشدی، ڈاکٹر صفدر عباسی اور سردار عبدالرحیم موجود تھے۔

اس کے بعد میڈیا سے گفتگو میں رہنماوں نے کہا کہ پوری قوم آئین اور قانون کی حکمرانی اورآزاد عدلیہ کیلئے آواز بلند کرے۔صدر الدین شاہ راشدی نے کہا کہ تحریک تحفظ آئین پاکستان کے رہنماوں کا شکر گزار ہوں، تمام ایشوز پر کھل کر بات ہوئی، خواہش ہے ہم سب مل کر پاکستان اور آئین کو مضبوط کریں۔

(جاری ہے)

انہوں نے مزید کہا کہ ملک محفوظ ہو جمہوریت اورآئین بالا دست ہو، ایسا تب ہی ہوگا جب عوام بھی محفوظ ہوں گے۔

اس دوران محمود اچکزئی نے کہا کہ پیر صاحب پگارا کا ایک مقام ہے، انہوں نے وطن کی آزادی کیلئے جدوجہد کی، آج اٴْن کے پوتے کو سٴْن کر اچھا لگا۔میڈیا سے گفتگو میں اسد قیصر نے کہا کہ 26 ویں ترمیم کے ذریعے 1973 کے آئین سے کھلواڑ کیا گیا ہے، پیپلز پارٹی اور بھٹو کے نواسے نے آئین کو مسمار کیا۔انہوں نے کہا کہ ضرورت ہے کہ پوری قوم نکلے، ذوالفقار علی بھٹو کی پیپلز پارٹی نے بہت مایوس کیا، یہ اب بھٹو کی نہیں زرداری کی پارٹی ہے۔

اسد قیصر نے مزید کہا کہ جی ڈی اے نے ہماری دعوت قبول کی ہے، ملک بھر سے نمائندگی آئی گی کہ پاکستان کو کیسے بچانا ہے۔ ہم ملک کو قائد اعظم کا پاکستان بنانا چاہتے ہیں، جی ڈی اے کو تحریک تحفظ آئین پاکستان میں شمولیت کی دعوت دی۔پی ٹی آئی رہنما نے کہا کہ سندھ میں بھی حالات خراب ہیں، اس کے خلاف بھی آواز بلند کریں گے، ہم عوامی بھی اور عدالتی جدوجہد بھی کریں گے۔

سلمان اکرم راجا نے کہا کہ پی ٹی آئی کی سیاست عوام کی سیاست ہے، ہم ہر مظلوم کی آواز ہیں، اس وقت ظلم کا، دھونس کا نظام ہے، پورے ملک میں لوگوں کے حقوق کی جنگ لڑیں گے۔انہوں نے کہا کہ دریائے سندھ پر 6 کینالز کے معاملے پر سندھ کے ساتھ کھڑے ہیں، آئی ایم ایف سے ہماری کوئی میٹنگ نہیں ہورہی۔پی ٹی آئی رہنما نے کہا کہ آئی ایم ایف والے پاکستان میں قانون کی رٹ کو جاننا چاہتے ہیں، اسی لیے چیف جسٹس سے ملاقات کی۔اٴْن کا کہنا تھا کہ ہم نے چیف جسٹس سے ملاقات بانی پی ٹی آئی کی مشاورت سے کی اور انہیں بتایا کہ ہم 26ویںآئینی ترمیم کو نہیں مانتے، ہم کسی تھرڈ ایمپائر کے انتظار میں نہیں۔