اپوزیشن نے اپنی بات رکھ دی ہے اور اب بات حکومت پر ہے، شاہد خاقان عباسی

اپوزیشن چاہتی ہے کہ نئے الیکشن ہوں، وہی مسائل کا حل ہے، شہباز شریف بھول گئے ہم اسی طرح سڑکوں پر کھڑے ہوتے تھے، سربراہ عوام پاکستان پارٹی کی گفتگو

فیصل علوی جمعہ 28 فروری 2025 12:34

اپوزیشن نے اپنی بات رکھ دی ہے اور اب بات حکومت پر ہے، شاہد خاقان عباسی

اسلام آباد(اردوپوائنٹ اخبار تازہ ترین۔28فروری 2025) عوام پاکستان پارٹی کے سربراہ شاہد خاقان عباسی کا کہنا ہے کہ اپوزیشن نے اپنی بات رکھ دی ہے اور اب بات حکومت پر ہے، بدنصیبی ہے کہ ملک میں سیاستدان ختم ہو گئے ہیں ،اپوزیشن چاہتی ہے کہ نئے الیکشن ہوں،وہی مسائل کا حل ہے، شہباز شریف بھول گئے ہم اسی طرح سڑکوں پر کھڑے ہوتے تھے،سماءنیوز کے پروگرام میں گفتگو کرتے ہوئے انہوں نے کہا کہ اصلاحات نہیں کی جا رہیں ہیں۔

حکومت کے پاس آج دینے کو کچھ نہیں۔ معنی خیز مذاکرات کے بغیر ملک نہیں چلے گا۔ دونوں کو ایک قدم پیچھے ہٹنا پڑے گا۔ موجودہ حکومت کا مسئلہ مینڈیٹ کا ہے ان کے پاس مینڈیٹ نہیں ہے۔ بانی پی ٹی آئی عمران خان کی حکومت مینڈیٹ نہ ہونے کی وجہ سے نہیں چلی گئی۔ آج کی حکومت بھی سیم پیج والی ہے ۔

(جاری ہے)

پیپلزپارٹی،پرویز مشرف،پی ٹی آئی کی حکومت دیکھی لیکن ایساپہلے کبھی نہیں ہوا۔

کل کانفرنس کے روز ہوٹل انتظامیہ پر دباو¿ ڈالا گیا۔ہم جب کانفرنس کیلئے گئے تو پولیس نفری موجود تھی۔حکومت کا رویہ غیر جمہوری اور بزدلانہ ہے۔ سیاست میں مفاہمت کی ضرورت ہے۔ہماری قومی کانفرنس کے اعلامیے میں آئین اور حکومت کی ناکامی ہے۔ان کا کہناتھا کہ شہباز شریف کی حکومت وہی کر رہی ہے جو بانی پی ٹی آئی کرتے تھے۔ بانی جیل میں ڈالتے تھے تو یہ مارتے بھی ہیں اور جیل میں بھی ڈالتے ہیں۔

بانی پی ٹی آئی عمران خان اگربات چیت چاہتے ہیں تو بات چیت ہو سکتی ہے لیکن اس کیلئے بانی پی ٹی آئی کو اپنا رویہ بدلنا ہو گا۔گفتگو کرتے ہوئے سابق وزیراعظم شاہد خاقان عباسی کا مزید کہنا تھا کہ بلوچستان،خیبرپختونخواہ،سندھ سمیت پورا ملک ہر حوالے سے پریشان ہے۔ حکومت نام کی کوئی چیز نہیںہے ۔کرپشن آسمان کو چھو رہی ہے۔ ملک میں آج جتنی بدامنی ہے اس سے پہلے کبھی نہیں تھی۔

اب ایم این اے،ایم پی اے کیلئے سفارش نہیں پیسے چلتے ہیں۔ میگا کرپشن سکینڈل کب پکڑا گیاہے؟صرف باتیں ہوتی ہیں۔ ملک میں کرپشن بڑھتی جا رہی ہے۔انہوں نے کہا کہ وزیراعظم دعوت دیں تو ملاقات کیلئے جاوں گا۔ بانی پی ٹی آئی بھی بلائیں گے تو ان سے بھی ملنے جاوں گا، نواز شریف جیسے ہی ملاقات کیلئے بلائیں گے توان کے پاس بھی چلا جاوں گا۔