پی ٹی آئی کاپاک فوج کے جوانوں اور شہدائے جعفر ایکسپریس سے اظہار یکجہتی کیلئے ریلی نکالنے کا اعلان

18مارچ کوجی پی او چوک سے پنجاب اسمبلی تک پرامن ریلی نکالیں گے،حکومت خلل نہ ڈالے ‘ اکمل خان باری

اتوار 16 مارچ 2025 19:30

پی ٹی آئی کاپاک فوج کے جوانوں اور شہدائے جعفر ایکسپریس سے اظہار یکجہتی ..

لاہور(اُردو پوائنٹ اخبارتازہ ترین - این این آئی۔ 16 مارچ2025ء)پاکستان تحریک انصاف نے پاک فوج کے جوانوں اور شہدائے جعفر ایکسپریس سے اظہار یکجہتی کیلئے ریلی نکالنے کا اعلان کردیا۔ پی ٹی آئی پنجاب کے نائب صدر اکمل خان باری نے اپنے ویڈیو پیغام میں کہا کہ جعفر ایکسپریس پر حملہ ظلم کی انتہا ہے جس کی بھرپور مذمت کرتے ہیں، یہ پاکستان پر حملہ ہے جسے ہم کبھی نہیں بھولیں گے۔

(جاری ہے)

اکمل خان باری نے کہا کہ شہدا ئے جعفر ایکسپریس سے اظہار یکجہتی کیلئے 18مارچ بروز منگل جی پی او چوک سے پنجاب اسمبلی تک پرامن ریلی نکالیں گے۔انہوں نے کہا کہ پنجاب حکومت سے درخواست ہے کوئی خلل نہ ڈالے، یہ شہدا ء سے اظہار یکجہتی کی ریلی ہوگی جس میں سانحہ جعفر ایکسپریس میں شہید ہونے والوں اور بہادر فوجیوں کے ساتھ بھرپور اظہار یکجہتی کیا جائے گا، ریلی میں پی ٹی آئی کارکنان، وکلا ء ، سول سوسائٹی کے لوگ بھرپور شرکت کریں گے۔